Pirme kulatahon

Dear Tita Salie,

Hello! Have a nice day. Ug sa tanan nga nagsunod sa imong column. Tagoa lang ko sa ngalan nga Jenny Rose, taga Cotcot, Liloan, Cebu.

Ang akong problema mao kining akong kahimtang karon. Duna man god ko’y live-in partner nga hingulata kaayo. Gaan gyod siya og kamot ug pirme lang ko niyang dapatan.

Dugay na nga gusto nako siyang biyaan, apan maglisod ko pagbiya tungod kay duna man kami mga anak ug dili man siya mosugot nga akong dad-on ang mga bata. Maluoy gyod ko nga biyaan ang akong mga anak.

Mao nga karon nag-antos gyod ko, Tita Salie. Tungod sa akong mga anak mosugot na lang ko bisan pirme ko niya kulatahon.

Manghinaut ko nga imo kong tabangan niining akong sitwasyon. Thank you and more power.

* * *

Good day Jenny Rose,

Wake up! Ayaw pag-antos nianang imong kahimtang karon. Ayaw itugot ug ayaw pagsugot nga yano-yanohon lang ka og kulata nianang imong banabana. Kinahanglan mosukol ka apil dili sa ingon nga pinaagi nga makigsinukmagay ka sa imong banabana tungod kay malupig gyud ka.

Ayaw kalimot nga dunay balaod nga mo-protect kanatong mga kababayen-an ug sa atong mga kabataan. Busa panahon nga kulatahon ka, imong picture-ran ang imong bun-og, mangayo ka og note sa doctor timaan nga gikulata ka ug imong isumbong ang imong live-in partner. Kay niining maong balaod ang imong partner nga hingulata kanimo mamahimo na nga dakpon ug prisohon. -- Tita Salie