Ang anino sa kaadlawon

Sa siyudad nagtrabaho si Rey. Apan magpaulian siya matag gabii sa ilang lungsod, singkuwenta ka kilometro gikan sa siyudad. Maayo siya’g trabaho ug dako’g suweldo. Kaadlawon siyang mobiya sa ilang balay paingon sa siyudad.

Usa ka kaadlawon nga nagtaligsik, wa makalahos pagkanaog si Rey sa ilang balay kay sa pag-abli niya sa pultahan, usa ka anino  sa tawo ang iyang nakita  duol sa ilang lagwerta. Unya daling mipahipi ang anino sa punoan sa dakong mangga duol sa ilang balay. Dunay punoan sa mangga ang ilang lagwerta.

Dali nga mibalik pagsulod sa Rey sa ilang balay. Gikuha ang dako nilang flashlight. Nahibulong ang iyang asawa nga si Susan.

“N-Ngano, Rey?”

Gisugid ni Rey kang Susan ang iyang nakita.

“H-Ha! Sus, basi’g daotan siyang tawo, Rey? Basi’g di siya ingon nato nga nagpuyo sa mangga. Giingnan na bitaw ka nga ipaputol nang manggaha kay basi’g taw-an na.” Gikuyawan si Susan.

“Dinhi ka lang kay akong susihon.” Unya gikuha ni Rey ang hait niyang sundang.

Pagkanaog na ni Rey sa ilang balay, misamot ang gibating kabalaka ni Susan. Naglakaw-lakaw siya sa ilang sala. Nipis nga gown para sa pagkatulog ang iyang gisul-ob. Misihag ang nindot niyang lawas. Matahom si Susan. Sa edad nga trayenta, mora’g dalaga gihapon siyang sud-ongon. Wa sila’y anak si Rey sulod sa lima ka tuig nilang kaminyuon.

“U-Unsa na, Rey? May nakita ka ba?”

Gisugat dayon ni Susan si Rey dihang misaka na sa ilang balay.

“Wa man koy nakita, San. Basi’g nasayop lang ko. Sige, adto na ko. Trangkahi la’g maayo ang mga bintana ug pultahan ning atong balay.”

Pagka hapon, gikasakay ni Rey ang iyang kumpare, si Ricardo. Sa siyudad sab nagtrabaho si Ricardo. Manedyer siya sa banko. Ulitawo gihapon siya bisa’g nag-edad nag trayenta singko.

“Kumusta na, Pre? Dugay-dugay na tang wa magkita.” Gipikpik ni Rey ang abaga ni Ricardo.

Natingob sa trabaho ang akong hunahuna, Pre. Unsaon, wa man ko’y hilig sa babaye. Mao bitaw nga wa gyod ko maminyo.” Mipahiyom si Ricardo.

Usa ra ka lungsod ang gipuy-an ni Rey ug Ricardo apan managlagyo ang ilang balay. Nagkakumpare sila kay managkaila man si Ricardo ug Susan. Si Susan ang nagpaila kang Ricardo kang Rey. Nangugos silang tulo sa bunyag sa anak sa kauban sa trabaho ni Ricardo.

Kusog ang ulan. Apan wa kini makapugong sa pagmata’g sayo ni Rey. Sayo pa ang kaadlawon. Apan nag-atang na’g kasakyan si Rey paingon sa siyudad. Unya namatikdan niya nga nahabilin diay ang iyang pitaka sa ilang balay. Nagdali siyang mipauli.

Usa ka anino sa tawo ang iyang nakita nga misaka sa ilang balay. Ug si Susan pa ang miabli sa pultahan. Misurok ang dugo ni Rey sa kasuko. Hilom nga milipot sa luyo sa ilang balay si Rey. Hinay niyang giablihan ang pultahan sa kusina. Ug dihang nakasulod na siya, gikuha niya ang hait niyang sundang.

Pagka buntag. Nagubot ang mga silingan nila ni Rey. Gidakop sa mga polis si Rey samtang si Susan ug Ricardo naglunang sa kaugalingon nilang dugo nga pulos hubo ang lawas sa sulod sa usa ka kuwarto. (Kataposan)