Ang sekreto ni Alexis

Sa laing dapit, naila kaayo si Lolo Delio. Siya man guy tigtuli sa mga batan-on. Gani, panahon sa tingbakasyon, magpundok gyud ang mga batan-on diha sa iyang payag. Kay ang uban kanila magpatuli, samtang uban, kuyogkuyog lang.

Hinuon, duna say panahon nga manganha lang ang mga batan-on sa payag ni Lolo Delio, aron sa pagpaminaw sa iyang mga sugilanon, nga pulos gayud karaan. Nga sagad natong mabati sa panahon ni Uray Angkay ug ni Tiyo Imbong.

Malingaw man gud silang mamati sa mga sugilanon mahitungod sa mga dwende ug mga higante. Ingon man bahin sa mga prinsesa ug mga prinsipe.

Bugti hinuon sa mga sugilanon, magdala gayud sila og mga laon nga tabako. Mahilig man gud manabako si Lolo Delio. Momaskada pa gani kini.

Sa laktod, nahimong suod kaayo si Lolo Delio hapit sa tanang mga batan-on sa ilang dapit. Lakip na gani niadtong mga edad-edaran na. Nga nakaagi usab sa pagka batan-on. Kay sama sa gibuhat sa mga batan-on karon, sa ilang panahon, diha man sab sila sa maong payag, ni Lolo Delio. Sa sama gihapong katuyoan.

Usa na nga dili gayud malimot kang Iyo Delio, mao si Alexis. Nga ning panahona, nagpabilin lang gihapong ulitawo, bisan may edad na. Nga unta, makamao man kining maibog og mga babaye.

Gani, maayo man kining manutok og mga babaye. Ilabi na niadtong mga babaye nga guwapa ug seksi kaayo. Apan, kutob lang lagi ni sa tutok. Kay wala man gyud kini mangahas sa pagpangulitawo, bisan pa ngadto sa iyang naibgan.

Daghan kaayo ang nahibulong kang Alexis, nganong wala gyud kini magminyo. Dili man unta ingnon nga mahadlok kini sa mga babaye. Kay makigsagol ug makigkinumedyahay man gani kini.

Kay hitsuraan usab si Alexis, daghan kaayo sa mga dalaga ang nangandoy nga sila maoy ulitawhan niini. Gani, diha may pipila kanila, ang mipaguwa og komedya nga dalang tinuod, nga kun sila lang maoy ulitawhan ni Alexis, dili pa gani kuno kini makatiwas sa iyang igsusulti, ila na dayon kining sugton.

Sa tinuoray lang, nangandoy usab unta si Alexis, nga makauyab. Ug maminyo pa gayud. Kay gusto sab siyang makabaton og mga anak, sama sa uban. Apan, mahadlok lang gyud siya, nga inigkaminyo unya niya, mahibaw-an ang iyang sekreto.

Duna man guy gitaguan nga sekreto si Alexis. Usa ka sekreto nga dili gayud niya mahimong ikatug-an ngadto sa uban. Bisan pa gani ngadto sa iyang mga suod. Lakip na gani sa iyang mga ginikanan.

Hinuon, dunay laing tawo nga nahibawo na sa iyang sekreto. Apan, misalig siya sa maong tawo nga dili gayud manabi, bahin sa iyang sekreto  ngadto sa uban. Ilabi na kay iya na kining gipinahan, nga dili gayud pasabaon mahitungod sa sekreto niya  nga maoy nahimong hinungdan, kun nganong dili gayud siya magminyo.

Ug ang maong tawo, mao si Lolo Delio. Ang bantugang manunuli sa ilang dapit, nga gisuod usab pag-ayo ni Alexis. Aron lang gayud magpabiling tinaguan ang sekreto niya ni Alesis. (Kataposan)