Pagbaliwala sa batakang balaud

Dunay mga lagda sa balaud sibil (Civil Code) nga nag-ingon “Ignorance of the law excuses no one.” Busa, dapat hatagan gyud og bili ang balaud. Labi na ang Batakang Balaud (Constitution) tungod kay sa atong Batakang Balaud, nga sinundog sa Amerika, “Our government is a government of the people, by the people and for the people.” Kun Binisay-on, ang atong gobiyerno, sa mga tawo namugna sa mga tawo ug alang sa mga tawo. Maong gikulit sa agtang sa Kapitolyo ang mga letrang nag-ingon “The authority of the government emanates from the people.” Apan gihatagan ba ni’g bili sa mga opisyales nato sa gobiyerno (tinudlo o pinili)? Maihap na lang sa tudlo ang naghatag og respeto ining pulonga sa atong Batakang Balaud.

Obserbahi ang mga dagkong tawo sa gobiyerno, kun motagad pa ba sa ordinaryong tawo. Matud sa batakang balaud, ang opisina sa gobiyerno, pagsalig sa mga tawo. Ug siyang naghupot sa maong katungdanan, dunay obligasyon nga magkuwentas klaras sa katawhan. Gani, sa di pa magsugod og serbisyo ang dakong tawo sa gobiyerno (pinili o tinudlo), manumpa siya nga respetohan niya ang Batakang Balaud. Apan kadaghanan sa nanumpa ini, nahikalimot.

Daghang opisina’s gobiyerno rong panahona nga paantoson ang mga tawo. Bisa’g alas otso pa sa buntag mangabli, ang mga tawo, alas kuwatro sa kaadlawon, magsugod na’g linya! Ngano man ni? Nganong di man pangitaa’g paagi nga malikayan ang pagsakripisyo sa katawhang gusto magpatabang sa maong opisina sa gobiyerno?

Serbisyo publiko man kaha ang tuyo sa gobiyerno? Nganong ang publiko lisodlisoron man? Di ba nanumpa man ang public servant to uphold the Constitution and perform satisfactory service to the best of his ability?

Kamong mga dagkong opisyales sa gobiyerno, duna nay “gahum” nga hinatag sa mga tawo. Dili ni angay abusohan gahuma. Kay ang maong gahum for the benefit of the people or the public. Busa dili ninyo angay himuon inyong opisina nga instrument sa inhustisya. Magserbisyo mo sa tumang katarong, isalikway ang favoritism, discrimination, personal bias, personal vendetta, mga raket ug hidden agenda. Kasagaran man gong mga tawo nga wa pa masulod sa gobiyerno, unya gustong mosulod, mangante man sa pag-ingon. “Bantay lang unya na siya, kun magamhanan na ko. Makatilaw gyud na siya nako!”

Kinahanglang neutral o impartial ang serbisyo. Dili dapat ma-impluwensiya sa laraw sa pagpanimalos, pagdumot ug kasina batok sa isig ka tawo.

Mao ni gipasabot ni Presidente Noynoy Aquino sa iyang pag-ingon “Kayo ang boss ko!” Apan bisa’g kinsa pay presidente, ang Batakang Balaud mao ra. Naghisgot og Diyos, gugma sa Diyos ug sa tawo.