Dear Tita Salie,
Have a wonderful day. Just call me Miss Merly, 23 years of age, usa ka minyo.
Nagproblema gyod ko pag-ayo niining akong bana, Tita Salie, nga labihan ka badlungon. Duna man unta siya’y trabaho apan dili kasaligan ug mao kini ang kanunay nga hinungdan sa among away.
Nag-uban man gud mi og puyo sa akong manghod aron mag-share mi sa abangan sa among balay. Apan kining akong bana nga badlongon dili mo-remit sa iyang sweldo ug ihurot kini sa drugs. Ug ari pa siya nako mangayog plite. Grabe lagi, Tita Salie. Ug kining akong manghod magsige na og pamuyboy kay dili na man mi kahatag og abang sa balay nga among gipuy-an.
Naglagot na gyod ko, Tita Salie. Palihog pasabta ko sa angay kong buhaton. Daghang salamat sa pagtagad.
* * *
Good day. Dili gyod lalim kun makapares kita og tawo nga iresponsable kaayo. Mas pait pa gyud kini kun kining tawhana mao ray gisaligan sa pagpangita og kuwarta.
Pakigsultihi ang imong bana mahitungod sa problema sa inyong pamilya. Kun kaya nimong buhaton mas maayo pay imong apason ang imong bana ngadto sa iyang trabahoan panahon sa iyang sweldo.
Puyde nimong hangyoon ang tigsweldo nila sa ilang trabahoan nga ikaw na ang modawat sa sweldo sa imong bana aron segurado nga dunay kuwarta nga moabot alang sa inyong pamilya. -- Tita Salie