Kapit patalim

Gula 6

Pag-abot ni Grace sa ilang balay, nagmata pa ang iyang ginikanan. Nahibulong kini nganong sayo siya nga nauli apan wala niya tug-ani sa nahitabo.

Didto sa higdaanan ni Grace, halos gihurot ni Grace pagpaagas ang iyang mga luha sa paghinilak. Daku kaayo ang iyang pagmahay nga misulod sa mao nga trabaho.

Gibasol niya ang grabe na kaayo nila nga kalisud mao nga nahisama na lang siya sa “kapit-patalim” nga bisan og nahibalo nga makasamad ang gikabyonan niya nga butang, apan iya gihapong gihimo aron maluwas.

Nahuna-huna ni Grace nga wala na siya’y nawong pa nga ikaatubang sa boyfriend niya nga tua magtrabaho sa gawas sa nasud nga mitakda na nga mopauli sa hinapos sa tuig aron sila magminyo.

Nasulbad tuod ni Grace ang kalisod sa ilang pagpuyo uban sa iyang ginikanan human siya mitrabaho pagka-masahesta, apan alang kaniya naguba ang iyang kaugmaon.

Wala gayud siya magduka. Nahuna-huna ni Grace ang iyang mga kauban nga masahesta nga gipahimuslan sa ilang manager aron paghimo’g law-ay nga matang sa pagmasahe didto sa Lingam Massage.

Nahinumdom si Grace sa nabasahan niya sa Banat News kaniadto nga adunay kampanya ang dakbayan sa Sugbo batok sa mga malaw-ay nga kalihukan. Nabug-os ang iyang huna-huna nga mo-report sa City Hall ug mangayo’g tabang aron masilotan ang lampingasan nga manager nga milugos kaniya.

Takulahaw lang giganoy na si Grace sa katulogon. Sa taliwala sa iyang paghinanok, nahigmata siya sa kusog nga tuktok sa pultahan. “Ngano gud nga nagbakho ka man Grace?” matud sa inahan. Miginhawa og lawom si Grace ug diha pa makabantay nga nagdamgo diay siya ug nagbakho. Bisan sa iyang paghikatulog gihambin niya ang kagul-anan.

Wala dayon siya makabalik sa pagkatulog. Giplano na lang ni Grace kun unsay iyang buhaton inigkabuntag. Taud-taud, nakatulog pagbalik si Grace.      Pagkabuntag, sayo nga nag-andam si Grace aron moadto sa City Hall. Wala pa’y alas nueve sa buntag, didto na siya sa City Hall ug nagpakisayod sa gwardya kun asa siya mangayo’g tabang.

Giduol sa gwardya ang usa ka reporter nga si Ely. “Sir, asa ni nato paadtoon kining babaye nga gibiktima kuno sa Lingam Massage,” gipangutana sa gwardya ang reporter.

Human mapangutana og gamay, gigiyahan dayon ni Ely si Grace ngadto sa opisina ni Dr. Lucelle Mercado, ang pangulo sa City Anti-Indecency Board (CAIB).

“Maayo kay mi-report ka dinhi sa City Hall, estrikto g’yud kaayo mi sa kampanya batok anang lingam massage,” matud ni Dra. Mercado. Taud-taud, gisabotan dayon nila ang usa ka operation. - Sumpayan