Isla Paraiso - Gula 94

Mitutok ang madre superyor kang sister Veronica. “Unya?” Ingon sa gipahunat siya niini.”

“Hinaot unta nga wala ako masayop ning maong hukom,” ni sister Veronica pa. “Mother Superior, i-ampo ako.”

“Don’t worry, my dear,” sa madre superyor pa. “Dili ka pasagdan sa Diyos sa imong paghukom.”

Daklit nga kahilom.

“Unsa man ang nakab-ot mong hukom?” Usisa sa madre superyor. “Unsa man ang plano mo karon?”

“Sa sunod namong panagsulti,” ni sister Veronica pa, “nakahukom ko nga...”

“Nga unsa, sister Veronica? Tiwasa ang buot mong isulti.”

“Sugton ko na si Rey, Mother Superior...”

“Good. Maayo kanang nakab-ot mong hukom.”

“Wala ka masuko kanako, Mother Superior?”

“Masuko? Nganong masuko man kuno ko nimo, sister Veronica? Ang tinuod, nakadayeg pa gani hinuon ko nimo tungod kay nagmatinud-anon ka sa imong kaugalingon.”

Kahilom.

“Kun magkahigugmaay na unya kamo,” sa madre superyor pa, “mao na kana ang panahon nga imong matimbangtimbang kun angay ba gayod kamo sa usa’g-usa. Kun imong masuta nga magmalipayon kamo kun mag-uban kamo dan, pakasli siya.” -- Sumpayan pa