Kapit patalim

Gula 2

Gikaila ni Grace si Gina sa fast food store sa dalan Colon. Walay laing bakante nga kalingkoran gawas sa lingkoranan atbang ni Gina. Daghang kustomer ang nanulod sa tindahan kay tingpaniudto.

Mahigalaon usab kaayo si Gina ug mipahiyom kini nga miawhag ni Grace nga molingkod uban kaniya sa usa ka lamesa. Nagsultihanay sila’ng duha samtang padayon nga nagkaon.

Bisan unsa na lang ang ilang gipanagsultihan hangtod nga miabot sa isyu sa pagpanarbaho. Gitug-an ni Grace kang Gina nga nagpangita siya karon og trabaho human siya matangtang sa gitrabahoan niya nga kompaniya.

Gipangutana ni Grace si Gina kun asa kini magtrabaho. Mipahiyom si Gina apan wala dayon kini motubag. Milingi-lingi si Gina ug pagtan-aw niya, adunay naglingkod sa lamesa sa ilang luyo.

“Unya na lang day kay duna’y makadungog,” giingnan ni Gina si Grace. Hitsuraan si Gina. Buwagaw og gamay ang iyang buhok ug hilig nga mangarte.

“Nindot tingali ka og trabaho Gin kay maila man sa imong pagpangareglar sa imong beauty,” matud ni Grace.

Dayon, nanindog ang kustomer nga diha sa ilang luyo. Nag-anam-anam na og kagamay ang mga kustomer sa fastfood store. “Sige na Gin, wala nay mga kustomer duol nato, tug-ani ko asa ka nagtrabaho kay basin matabangan ko nimo pagpasulod sa imong gitrabahoan,” matud ni Grace.

“Ambot og makagusto ka ba kaha sa akong trabaho. Masahesta ko Grace. Gabii ang akong duty mao nga panahon sa adlaw, free ko ug mahimo nga magsuroy-suroy lang,” ni Gina pa.

Mora’g naminghoy si Grace kay dili usab siya makamao nga momasahe. Nagbayloay sila si Grace ug Gina sa ilang contact numbers.

“Kontaka lang unya ko day kun gusto ka nga motrabaho sa akong gitrabahoan. Dali ka ra nga makat-on. Dagko ra ba ta’g tip nga makuha gikan sa mga kustomer, labi na pareho nimo nga gwapa,” ni Gina pa.

Nanglabay ang mga adlaw, wala gayud makasulod og trabaho si Grace. Miabot pa gayud ang iyang problema kay nasakit ug naospital ang iyang amahan.

Napugos si Grace paggasto sa nahabilin niya nga kwarta nga gitipigan niya aron mabayran ang pagpatambal sa iyang amahan. Usa ka buntag, nakahukom na si Grace nga motrabaho sa massage parlor nga gitrabahoan sa amiga niya nga si Gina.

Giteksan niya si Gina ug nagkita sila sa fastfood store  sa dalan Colon diin sila nagkita sa miaging buwan.

Human sila makakaon, giubanan si Grace ni Gina didto sa gitrabahoan niini nga massage parlor nga nahimutang sa hilit nga dapit sa Barangay Kasambagan.  Nabasa ni Grace sa karatola – Lingam Massage. - Sumpayan