Mahadlok na

Dear Tita Salie,

Have  a nice day. Just call me Ching, still single, dunay boyfriend sa una apan karon buwag na mi.

Magpatambag lang unta ko nimo kun unsay angayan nakong buhaton niining akong situwasyon karon.

Six months ra mi kutob sa akong uyab. Karon nga buwag na mi makaingon ko nga wala na gyud ko’y feelings kaniya. Apan mora lang gihapon mi og uyab tungod kay magsige ra man gihapon siya og adto sa among balay.

Karon, Tita Salie, dunay nanguyab nako. Buotan ra ba siya. Apan ang problema kay mahadlok na man ko nga tingali kun masakitan lang gihapon sama sa una. Unsa may akong buhaton? Palihug pasabta ko. Thank you so much and more power.

* * *

Hello Ching,

Pasagdi lang ang imong ex nga magsige’g suroy nganha sa inyo. Tingali kun nindot gyud ang iyang na build-up nga friendship sa imong pamilya ug mao kini ang hinungdan nga ganahan gyud siya moanha sa inyo. Ang importante lang niini mao nga imo gyud siyang sultihan sa tinuod nga wala na kay feelings kaniya ug karon nag-entertain na ka og laing suitor, aron dili na siya magdahom ug mulaom.

Unya sa dili pa ka mobalhin nianang laing relasyon mas maayo tingali nga imo unang ayuhon ang imong kasingkasing kun andam na ba kini alang sa bag-ong gugma nga mosulod aron malikayan ang problema. Kay sama sa uban nga midawat  og laing bag-ong gugma apan nagpabilin sa ilang kasingkasing ang karaan nga pagbati nga maoy hinungdan sa ilang mga kalibog.

Unya kun mahigugma ka dapat andam ka kanunay sa mga kasakit tungod kay sa gugma dili ka kanunay malipay. -- Tita Salie