Isla Paraiso

Gula 90

“Usa ra gayod ang imong pilion, sister Veronica,” nagkanayon ang madre superyor. “Ang Diyos o si SPO3 Corpuz. Apan kun pilion mo si Corpuz, ayaw kabalaka nga nakalapas ka sa bisan unsang balaud. Balaanon ang paghigugma, sister Veronica.”

Si sister Veronica milugak sa paggakos sa madre superyor. Karon mitutok siya sa edaran na nga madre. Nagtutok diay usab kini kaniya. Unya mipahiyom kini.

“U-unsay akong buhaton sa sunod namong panagsulti?” Nangutana si sister Veronica.

“Anaa ra kana kanimo,” nagkanayon ang madre superyor. “Apan ayaw kalimot sa pagpangayo sa giya sa anaa sa itaas aron dili ka masayop sa ipakanaog mong desisyon. I know you are wise enough to decide what’s the best for you.”

Miduko si sister Veronica.

“Magsulti lang unya kita pag-usab kun makahukom ka na,” nagkanayon ang madre superyor. Ug wala madugay, migawas na kini sa lawak ni sister Veronica.

Sa dihang nag-inusara na si sister Veronica sulod sa iyang lawak, iyang gitimbangtimbang pag-ayo ang angay niyang buhaton. Gipamalandongan niya’g maayo kun unsa ang angay niyang ipakanaog nga hukom karon.

Tinuod nga gusto gayod siyang moalagad sa Diyos sa tibuok niyang kinabuhi. -- Sumpayan pa