Two Lovers

Gula 5

Nasurpresa si Rosemarie kay gipaandaman diay siya og gamay’ng pagkaon ni Virgilio aron kasaw-an kini nilang mga kawani. Nanuroy pa gayud sila si Virgilio ug Rose pagkahuman sa trabaho, apan wala sila magdugay kay trabaho pa pagka-ugma.

Tulin ang pagpanglabay sa mga adlaw sa pagtrabaho ni Rosemarie sa kompaniya nga gidumala ni Virgilio. Ang gidugayon sa subli nila nga panag-uban nahaling pagbalik sa kainit sa pagbati ni Virgilio ngadto ni Rose.

Nakabantay niini si Rose, ilabi na sa mga panahon sa ilang panag-uban ni Virgilio. Gihuna-huna na hinoon daan ni Rose nga kun moabot ang higayon nga mopadayag pag-usab si Virgilio sa iyang pagbati kaniya, dili niya kini pakyason.

Gihuna-huna ni Rose nga patay na ang iyang bana nga si Jeffrey tungod sa pagkalunod sa gisakyan niini nga barko paingon dinhi sa Sugbo gikan sa Manila. Bisan og wala pa hinoon moabot ang pito ka tuig gikan sa iyang pagkahanaw, apan hinay-hinay na nga mitoo si Rosemarie nga patay na si Jeffrey.

Wala gayud masayop si Rose kay usa ka higayon nga nagkuyog na usab sila si Virgilio nga mitambong og birthday party sa higala niini nga taga Barangay Buhisan, nadala ang manager ni Rose sa kaanindot sa dapit nga ilang nahimutangan.

Mingaw ang mao nga dapit nga giadtoan nila ni Rose ug Virgilio. Nag-umbaw kini sa tibuok dakbayan. Nindot kaayo ang talan-awon sa kinaubsan. Human sila makakaon, nagkalingaw sila og sultihanay didto sa harden.

“Wala ka ba mahibulong Rose kun ngano nga gusto ko nga magkauban kita kanunay?” gipangutana ni Virgilio ang iyang hepe sa accounting section. Wala g’yud dayon makatubag si Rose sa pangutana ni Virgilio bisan og nasayod siya sa tubag.

Gipahimudsan ni Virgilio ang pagpakahilom ni Rosemarie. “Mahimo ba Rose kun balikon nako ang pagpaninguha nimo kaniadto? Abi nimo Rose bisan human sa imong kaminyoon kang Jeffrey apan nagpabilin ako nga in-love gihapon kanimo,” ni Virgilio pa.

Ingon sa natuk-an g’yud si Rosemarie sa pagpanguyab pagbalik ni Virgilio kaniya. Ang tinuod, mipitik na usab og gugma ang iyang kasing-kasing ngadto ni Virgilio apan mahadlok siya nga lainon pagsabot ni Virgilio kun iya dayong sugton ang manager.

“Patay na ang imong bana Rose mao nga may katungod ka na nga mangita’g ikahulip sa iyang dapit. Ako maoy mangamahan sa bugtong ninyong anak ni bai Jeffrey,” matud ni Virgilio nga migunit sa kamot ni Rose.

“Huna-hunaon usa nako Vir. Hatagi ko’g higayon,” matud ni Rosemarie nga nagpahiyom. Daw nabatyagan ni Virgilio nga may kahayag sa paglaum sa iyang pagpanguyab pag-usab ni Rose. - Sumpayan