Two Lovers - Gula 4

Nagkita g’yud sila si Virgilio ug Rosemarie sa dakung tindahan atubangan sa University of the Visayas.

“Nananghid lang ko sa akong maestro nga dili lang mosulod sa klase karong gabhiona kay may deyt ko sa gwapa nako nga crush kaniadto pa,” giingnan ni Virgilio si Rose.

Diha pa masayri ni Rosemarie nga bisan og manager na si Virgilio apan mipadayon pagtungha ug mikuha og kurso pagka abogado.

“Taas kaayo ka’g pangandoy sa kinabuhi…, Sir no?” matud ni Rose nga mora’g nabakikawan g’yud nga mosangpit og Sir sa kanhi niya classmate. Nakabantay niini si Virgilio.

“Kun magkuyog gani ta’ng duha Rose, ayaw lang pag-sir nako. Adto sa opisina mahimong tawgon ko nimo’g sir, respitar sa ubang mga kawani,” matud ni Virgilio nga nagpahiyom.

“Mangaon ta, adto ta sa paborito nako nga kan-anan kay lami kaayo didto sa Krispipata,” giingnan ni Virgilio si Rose. Nag-ampad sila paglakaw subay sa aseras paingon sa parking area sa The Freeman.

Kaila ni Virgilio ang general manager nga si Bhoy Mendoza ug mihangyo lang siya nga maka-park kadiyot sa iyang sakyanan atubangan sa building sa Freeman.

“Dili baya unta ko mosugot nga anhi idistino sa among kompaniya sa Cebu City kay mahandom nako ang akong kapakyasan sa gugma ko kanimo Rose,” matud ni Virgilio samtang nagdagan ang kotse paingon sa uptown.

Wala dayon motubag si Rosemarie. Ang tinuod, nakagusto usab si Rosemarie kang Virgilio dihang nanguyab kini kaniya kaniadto, apan mas bug-at lang g’yud kaniya si Jeffrey mao nga kini ang iyang gisugot.

Sport nga pagkatawo si Virgilio kay mitambong pa gani kini sa kasal nila ni Rosemarie ug Jeffrey. Kalit ra hinuon kini nga nahanaw kay miadto diay sa Manila human sa kasal sa babaye nga mibasted sa iyang gugma.

“Sa ato pa, hapit na duha ka tuig nga wala kay balita bahin kang Jeffrey gikan sa pagkalunod sa gisakyan niya nga barko?” gipangutana ni Virgilio si Rose.

Gitutokan ni Virgilio si Rose nga igo lang miyango. “Ayaw kabalaka Rose, sa imong sweldo isip hepe sa accounting section sa opisina, mabuhi mo na ang imong anak,” giingnan ni Virgilio si Rosemarie.

“Salamat kaayo Vir,” matud ni Rose nga nagpahiyom. Pagka-ugma, nagsugod dayon si Rose sa pagtrabaho sa kompaniya nga gidumala ni Virgilio.

Miabot ang birthday ni Rose apan wala niya kini ipahibawo sa iyang mga kauban sa opisina kay wala siya’y budget para ibangka kanila og pagkaon. -– Sumpayan