Mga pulang rosas alang kanimo, Rose

Maoy naabtan ni Gally si Rose sa balay niini nga nakailis na ug naghulat kaniya. Gitunol dayon ni Gally ang mga pungpong sa pulang rosas ngadto kang Rose. “Mga pulang rosas nga lab-as, alang kanimo, Rose! My dearest! My dearest, Rosalie!”

“Salamat, Gal! My dearest Gallileo! Gipasamot ang akong gugma nimo, atol ning kasaulogan sa adlaw sa gugma...!”

“Oo, Rose! Gimatuod ko lang nimo nga ikaw ang ikaduha kong Bathala, human ko mabiyudo sa kanhi kong asawa nga namatay sa breast cancer!”

“Parehas tang duha, Gal! Ikaw usab ang nakat-onan kong ikaduhang Bathala, sukad lang sab ko mabiyuda sa mitaliwan na nakong bana....!”

“Ug karon ang una natong panagdey’t sukad sa atong panag-uyab nga atol gyud ning adlaw’ng Biyernes nga kasaulogan sa Valentine’s Day...!” mapahiyumon si Gally nga mikihat kang Rose.

“Tana, Rose! Tua sa atbang nga daplin sa dalan  giparking ko ang bag-o kong Hyundai nga awto!”

Giserhan ug gi-locked dayon ni Rose ang pultahan sa giabangan niyang balay sa dalan Natalio Bacalso Avenue. Mao usab kini ang giabangan nilang balay sa mitaliwan na niyang writer nga bana nga nagkasakit og kanser sa utok. Parehas silang mga magtiayon nga sikat nga mga writer sa Kabisay-an ug Mindanao. Dihang nabiyuda na si Rose, gikaila dayon niya si Gally, nga gawas nga usa usab ka inilang writer, nanag-iya usab og labing dakong printing press sa Lahug. Wa siya magdahom nga usa usab diay ka biyudo si Gally. Ug nagkahinigugmaay sila.

Didto sangko ang light green nga awtong Hyundai ni Gally sa sulod sa motel nga may grahe. Sa pagsulod nila sa mabugnaw’ng lawak, bitbit na usab ni Gally ang laing pungpong sa mga pulang rosas nga gibutang niya sa sulod sa iyang awto ug puno sa pagmahal nga gihatag kang Rose, dihang nagtupad na sila og lingkod sa ngilit sa hunolhunol nga kama.

“Laing mga pulang rosas nga lab-as, alang kanimo, Rose! Timaan kini sa nag-uros-uros kong gugma nimo...!”

“Hinaot pa nga diha kanimo, Gal, makabaton na ko’g anak nga wa ikahatag sa baog kong bana kanhi....!”

“Mao gyu’y pangindahay ko nga makaliwat ko’g anak gikan nimo, Rose, nga sama nimo, guwapa ug insekon sab ang mga mata! Nya, bigot pa gyud kaayo’g lawas nga way pagkapuol nga romansahon! Magpakasal tang duha!” ug gigakos dayon ni Gally si Rose nga mibalos usab paggakos kaniya.Nagtinal-upay dayon ang ilang mga ngabil.

“I love you, Rose! You’re my sweet Valentines....!”

“I love you too, Gal! Very much...! You’re my sweet Valentine’s too!”

Ug paspas nga naghukas sa ilang mga sapot ang duha ka biyudo ug biyuda sulod sa bugnaw’ng lawak sa motel, aron sa unang higayon, saw-an nila ang dugamis sa ilang gugma, nga daw dili na gayud kapugngan ang pagdagayday sa tubod niini sulod sa ilang mga kasingkasing. (Katapusan)