Palihi

Enero 1. Alas dos sa hapon. Tulo pa ka awit ang nakanta ni Jessie sa videokehan sa ilang silingan,
giapas siya ni Mila iyang kapikas. “Naunsa ba ka? Nga nahitagpilaw lang ko’g kadiyot huma’g
paniudto nato, nawala ka mag kalit. Pero, dungog kaayo nako ang imong tingog sa ato” ni Mila nga may tunada sa pagmahay.

“Nagsabasaba lang ko. Kay mingaw na man kaayo ang Bag-ong Tuig. Wa na ko kadungog og pabuto o torotot” ni Jessie. Naggunit sa mikropono. Apan wa kakanta. Nagpasiklap sa screen sa videoken. Nitingog na ang duyog sa What A Wonderful World.

“Nagpalihi man ka’g kanta! Gusto ka nga magkanta na lang ka kada adlaw, tibook tuig?” ni Mila. Nilingkod sa bakanteng lingkuranan dikit sa lamesa atbang sa lamesa ni Jessie.

“Di man. Ikaw hinooy kanta, “o ni Jessie nga nitunol sa mikropono ngadto sa kapikas. Wa pay laing customer sa videokehan. Seryoso ang nawong sa asawa nga nagtutok sa bana.

Sila na lang duha sa ilang balay sa sityo Dakulog ning dakbayan. Ilang duha ka mga anak lalaki mga minyo na. Didto sila mag-Noche Buena sa balay ni Roger kinamaguwangan. Gabii, sa Media Noche, didto sila sa balay ni Rolly. Mga retirado na sila nga magtutudlo sa saring publiko. Pensionado na sila. Unya pito na ka tuig nga nibiya si Jessie og inom. Kantakanta og basabasa na lang iyang lingaw. Kang Mila telenobela.

“Basig mobalik ka’g inom. Di na ra ba ka paimnon sa doktor kay taas imong dayabitis” ni Mila

“Pagkatinood, wa na gyud ko’y laraw nga mobalik pas bisyo. Nindot na god kaayo akong gibati sa lawas nga nibiya na ko’g inom. Good feeling akong palihi. Gusto ko nga tanang adlaw tibook tuig, duna koy good feeling. Nindot nga pagbati” ni Jessie. Nagpahiyom.

Niduol sa videoke ug gipindot ang STOP aron magkahinabi sila’g tarong.

“Unsa man nang matanga sa good feeling?” ni Mila. Naisang kilay.

“Ang good feeling akong gipasabot, kanang way saput, way kalagot, way kasuko, way pagdumot, way kahiubos, way kasubo, way kasuya batok sa isig ka tawo. Kanang maayong pamati sa kapiskay sa panglawas,” ni Jessie. Gibutang ang mikropono sa lamesa. Nilingkod tupad sa kapikas.

“Nganong maapil man ang kalagot o uban pa?” ni Mila.

“Ang tawo nga makakanta, naa tanan ang good feeling. Sulayi’g kanta nga gisaput ka, nagsubo o naglagot. Di ba di gyud ka kakanta og tarong. Sulayi’g kanta kun nagluya imong lawas. Di gyud ka kakanta’g tarong. Mao na akong palihian. Ang good feeling. Para duna tay good feeling tanang adlaw sa tuig” ni Jessie. Nakapahiyom si Mila.

“Sige. Pindoti ko’g This Masquerade. Kay mokanta ko. Gusto man kaha kang manganta ta’s gawas sa ato. Tua man unta ta’y sound system sa balay” ni Mila. Nitindog ug gipunit ang mikropono sa lamesa.

“Puol man sab nang siging ato ang gamiton. Sa pagkaon pa na, dine out sab ta’g panagsa” ni Jessie. Nakapahiyom. Niukab sa songbook. Nikuot og coin aron mopindot sa videoke alang sa request sa kapikas. (Katapusan)