Gamiton nga maybayad

Dear Tita Salie,

Maayong adlaw ug kumosta? Tagoa lang ko sa ngalan nga Syrel. Dili pa kasado apan duna koy live-in partner nga batan-on pa.

Sa wala pa mi magtipon niining akong live-in partner, Tita Salie, daghan na ang mga lalaki nga migamit kanako. Ang uban dagko na’g edad or medyo tiguwang na. Gamiton ko nila apan dunay bayad.

Karon, Tita Salie, natingala lang ko sa akong flower karong mabdos na ko og duha ka bulan kay lain na man og baho. Wala baya masayod ang akong partner mahitungod sa akong past.

Unsa may akong buhaton? Palihog pasabta ko, Tita Salie. Thank you and more power to your column.

* * *

Good day  Syrel,

Nalipay ko nga medyo nindot na ang imong kinabuhi karon ug duna na kay gugma nga nakaplagan. Ug at least duna na kay pamilya nga ikaw gyud ang mopundar niini, ikaw ang rayna nga maoy imong ulianan.

Kun buntis ka kinahanglan man nga magpakita sa imong obgyne dili ba? So, inigsunod nga mobisita ka niya isulti kining imong namatikdan sa imong kaugalingon aron iya kining pangitaan og paagi. Isulti nimo ngadto kaniya ang imong background aron iyang mahibaw-an kun unsay imong gikinahanglan.

Ang imong kasinatian itago na lang kini diha sa imong handomanan ug ayaw na lang kini isulti sa imong partner. Paningkamoti nga imo nang makalimtan ang mga kapait nga imong naagian, ang ipadayon ang bag-o nimong nasugdan. -- Tita Salie