Isla Paraiso - Gula 74

“Sama sa naandan, pressured kaayo sa trabaho,” laktod nga tubag ni Rey sa pangutana ni sister Veronica kaniya. “Hilabihan kadaghan ang mga kaso nga nagkinahanglan og dinaliang pagtagad.”

“Kuyaw kaayo kanang imong trabaho, di ba? Kanunay ka gud maka-engkuwentro og mga kriminal,” ni sister Veronica pa.

“Tinuod nga kuyaw kaayo kining matang sa trabaho nga akong gisudlan. Apan alang kanako, kun dili pa mamatay ang tawo, dili pa gayod siya mamatay.”

“Abi mo,” ni sister Veronica pa nga mipahiyom og hilaw, “wa gyud ko magdahom nga mahimo ikaw nga usa ka maayong laking polis.”

Kalit miligdong ang nawong ni Rey nga tul-id nga mitan-aw sa madre. “Kapakyasan ang nagtukdmod kanako, sister, nga magpolis.”

“U-unsay buot mong ipasabot?” Misukot si sister Veronica nga wala’y nasabtan sa gipanulti ni Rey.

“Ang kapakyasan sa gugma ko kanimo kaniadto maoy hinungdan nga misulod ako pagka-polis,” ni Rey pa. Wala makatingog si sister Veronica. Wala siya magdahom nga ang iyang gipamulong mao bay himuon nga yawe ni Rey aron buksan ang pultahan sa tema sa gugma. Kanindot unta sa ilang gipanagsultihan kaganina. Karon mikalit sa kalain ang sabaw nga gitipas ni Rey bahin sa gugma. -- Sumpayan pa