Isla Paraiso

Gisaad na ni sister Veronica sa iyang kaugalingon sa wala pa siya mopakanaog sa hukom pagsulod sa kumbento na ang Diyos na lamang ang iyang higugmaon. Ug dili niya lubagon ang maong saad. Iya gayod kining tumanon.

“Gikasubo ko, Rey,” namulong si sister Veronica pagkataudtaod. “Dili ko gayod madawat ang imong gugma. Sa gikaingon ko na, ang Diyos na maoy tag-iya sa akong kasingkasing ug kalag.”

“Sa gihapon, andam ako nga maghulat, sister Veronica,” mahuyo ang tingog ni Rey. “Paabuton ko ang panahon nga malukmay ang imong balatian ug higugmaon mo na ako.”

Kahilom.

“Hangyoon ko lang ka nga unta magmatinud-anon ka sa imong kaugalingon, sister Veronica. Hinaut pa unta.”

Human sa panagsulti nila ni sister Veronica ug Rey, matinahuron nga nanamilit ang naulahi nga siya mopauli na. Lapas na ang ikatulo sa kagabhion niadtong tungora. Milungtad gayod og kapin sa usa ka takna ang ilang pagbinayloay sa mga katarungan. Si Rey migawas sa kumbento nga nagbug-at ang kahiladman.

Taudtaod nang nakalakaw si Rey apan si sister Veronica nagpabilin pa nga naglingkod sa sopa nga ingon sa blangko ang kaisipan. Naigking lang siya sa dihang may milagubo didto sa gawas sa dihang mihapak ang kusog nga hangin. -- Sumpayan pa