Call Center Agent

Gula 6

Nakabantay si Nelson nga mora’g naigo g’yud si Gemma sa espiritu sa beer nga iyang nainom. Giingnan niya si Gemma nga mamiya na sila sa diskohan aron ihatud na niya kini sa iyang gipuy-an.

Gitutokan ni Gemma ang iyang relo sa wala nga bukton. Dugay kaayo kini niya nga gitutokan. “Mora man og nahalap ang akong panan-aw Son uy, nahubog g’yud ko da.” Gipasiklapan ni Nelson ang iyang relo ug gitug-anan si Gemma sa oras.

“Hapit na alas tres sa kaadlawon Gem. Tana, ihatud na tika,” matud ni Nelson. Mora’g mibathay ang kabalaka sa panagway ni Gemma nga nakadungog nga hapit na diay alas tres sa kaadlawon.

“Hala uy, alas tres na diay? Di na g’yud ko makasulod sa balay karon. Maikog na ko nga mamukaw sa tagbalay,” ni Gemma pa nga mipiyong sa iyang mga mata. “Mao ba? Unya, unsaon man nato karon Gem?” matud ni Nelson.

Naghuna-huna si Nelson og paagi kay ang diskohan alas tres ra ‘sab kutob. “Katulgon na ra ba ko kaayo da,” matud ni Gemma nga nausab na g’yud ang sinultihan. Mora’g yungit na nga manulti si Gemma.

“Sa akong gipuy-an makasulod gihapon ko apan pulos mi mga lalaki didto. Law-ay kaayo tan-awon nga ikaw ra ang babaye ang adto matulog,” giingnan ni Nelson si Gemma.

“Wala g’yud kay laing ideya Son? Katulgon na g’yud kaayo ko... nalipong g’yud ko Son,” matud sa call center agent.

Kalit nga misantop sa huna-huna ni Nelson nga isugyot kang Gemma nga adto na lang sila magpabuntag sa motel. “Wala na g’yud ko’y nahuna-hunaan nga paagi Gem gawas sa mao nga lugar aron ta makapahuway. I’ll promise nga dili tika hilabtan,” matud ni Nelson.

Gipiyong ni Gemma ang iyang mga mata. Mora’g iyang gihuna-huna kun unsay iyang itubag kang Nelson. Taud-taud gibuka ni Gemma ang iyang mga mata. “Sigi, sigi, tana dayon kay katulgon na g’yud kaayo ko,” sa dalaga pa.

Nanggawas sila sa diskohan. Giagak ni Nelson si Gemma. Sa hilom gikalipay ni Nelson nga nahubog si Gemma kay paraygon na kaayo kini kaniya ug gani iya na nga magakus. Dunay drayber og taksi nga mikamay kanila aron adto mosakay sa iyang sakyanan.

Misakay sila sa taksi. Mideritso pag-irag si Gemma sa sandiganan ug gipiyong ang mga mata. “Adto na lang ta sa Queen’s Court bai,” giingnan ni Nelson ang drayber. Misirit ang taksi paingon sa Barangay Subangdaku.

Gipasandig ni Nelson si Gemma sa iyang dughan ug gihapyud-hapyod niya ang buhok sa dalaga nga daw gipaningot. - Sumpayan