Gula 61
Gisundan ni Rey Corpuz si Col. Martin Villadar nga mipaturatoy sa paglakaw. Didto kini mopaingon sa lawak-buhatan ni Capt. Benale.
Takulahaw lang, dihay interes nga mitungha sa kaisipan ni Rey. Naikag siya nga magpakisayod kun unsay tuyo ni Col. Villadar sa iyang labaw nga opisyal. Nakahatag kaniya’g tanghaga kadtong gipakitang taras ni Koronel Villadar kaniya nga wala motagad sa iyang pagtimbaya ug ang pagmug-ot sa nawong niini. Unsa kahay problema? Ug nganong misulod man kini sa buhatan ni Capt. Benale? Nahibulong niini si Rey dili man ginhapon buhaton kini sa Koronel. Ang sagad mahitabo mao nga kun may tuyo ang koronel sa kapitan, adto man sila magsultihanay sa lawak buhatan sa nahauna. Apan karon ang koronel na gayod ang mituyo pag-adto sa buhatan sa kapitan. Ngano kaha?
Tingali mahinungdanon gayod kaayo ang tuyo ni Col. Villadar kang Capt. Benale. Mao kini ang misangpot sa hunahuna ni Rey kay mituyo man gayod ang koronel pag-adto sa lawak-buhatan sa kapitan.
Sa dihang natak-op na ang sera sa pultahan ni Capt. Benale human makasulod si Col. Villadar, naghinuktok si Rey nga wala makalihok sa iyang gibarogan. Unya milingilingi siya sa dihang may ideya nga kalit lang misantop sa iyang hunahuna. -- Sumpayan pa