Pista Senyor: Magsinulog ta, Gaw Marman

Maoy nasiklapan ni Al ang iyang ig-agaw nga linga kaayo ang panan-aw samtang miuliot paglakaw sa bagang duot sa katawhan nga naglinyang nagtindog daplin sa dalan P. del Rosario, nga misaksi sa tanang misalmot sa gipahigayong Sinulog Festival sa rota nga gisubay. Giduol ni Al ang ig-agaw niyang magsusulat nga nanggungis na sa natad sa panulat, nga sama niya, usa na sab ka senior citizen.

“Magsinulog ta, Gaw Marman...!” dagpi ni Al sa iyang ig-agaw nga nahalingi kaniya. Managsama sila nga mga writer nga taga Opon, nga kun magkakitaay sa bisan asang dapit magtinagayay dayon sa beer ug bino nga ilimnon, nga maghisgothisgot sa ilang pagkamagtatampo sa Banat News ug sa laing tabloid binisaya sa siyudad sa Sugbo. Unya, kun parehas na sila kundisyon ug moepekto na ang espiritu sa ilimnong makahubog sa ilang galamhan, adto dayon sila sangko sa mga suki nilang inday-hilay sa balay kahilayan sa dalan Junquera.

“Uy, ikaw man diay, Gaw Al! Sus, tayming gyud ning atong panagkita nga atol sa Adlaw sa Sinulog...!”

“Mao lagi, Gaw Marman! Gusto kong magsinulog sab ta atol sa kapistahan ni Senyor Santo Niño...!”

“Aw, magsinulog god tang duha, Gaw Al! Apan magpakundisyon una ta og binong ilimnon. Dayon, modalikyat ta’g duaw karon sa suki tang batan-ong boring sa dalan Junquera....!” nagkihatkihat si Marman nga sukad lang mabiyudo ug nag-senior citizen na, misamot hinuon ang kasiaw ngadto sa mga babayeng mugbo’g lupad, bisan gani didto sa ilang dapit sa Opon.

“Mahimong ubanan tika, Gaw Mar, paingon sa dalan Junquera ug  mobiya ta dinhi sa atong gitindogan sa P. del Rosario Street! Apan igo lang ko sa inom, ha! Nakasaad na ko kang Senyor Santo Niño nga dili na ko mogamit og mga batan-ong boring, aron dili na ko makasala pa sa akong asawa! Gusto na kong magbag-o sa kinabuhi ug ipukos na lang ang panahon sa panulat...!”

“Aw, ikaw god, Gaw Al! Ako di gyud makaantos kun di ko makaromansa sa suki kong batan-ong mamords nga boring! Tana, magpakundisyon ta’g tinagayay sa gamay’ng tindahan diha sa Junquera, aron mosawsaw dayon ko sa tinan-ogan kong tsiks...!”

“Basta, magsinulog ta, Gaw Marman, ha...!” ni Al nga mikuyog dayon kang Marman sa usa ka gamay’ng tindahan sa dalan Junquera nga dili kaayo huot sa mga tawo. Nagsugod dayon sila sa pagtagay sa binong ilimnon. Sa rotang kadalanan padayon nga mabati ang lagubo sa tambol, dram ug biyogol nga nagduyog sa mananayaw og Sinulog.

Nakapanglingo si Al atol ning kasaulogan sa Pista Senyor nga naghunahuna kang Marman nga niadtong orasa, nakigtagay nas kalipay uban sa suki niyang inday-hilay, sulod sa usa ka kuwarto sa dili mailhan nga balay-kahilayan.

Paglabay og usa ka semana, human sa gipahigayong Sinulog Festival may nadiskubrehan si Al sa iyang ig-agaw nga si Marman sa iyang pagduaw niini sa balay didto sa Opon. Maglisod na kini sa pagpangihi! (Kataposan)