Maglisod

Dear Tita Salie,

Maayong adlaw kanimo. Hinaot nga imo untang mahatagan og pagtagad kining akong suliran tungod kay galibog na gyod ko pag-ayo kun unsay angay nakong buhaton, Tita Salie.

Tagoa lang ko sa ngalan og Arjie, usa ka minyo ug dunay upat kabuok mga anak. Duna ko’y maayo nga trabaho tungod kay naa man ko sa business travel nga negosyo.

Nakarelasyon man god ko sa usa ka babaye. Bisan nasayod siya nga dako kaayo kong minyo apan mipadayon lang gihapon siya. Pinangga ra ba ko pag-ayo niining bayhana, Tita Salie.

Kun mag-war mi modayon siya’g kuha og kutsilyo ug maglaslas sa iyang pulso. Tungod niini maglisod na hinuon ko sa pagpakigbulag kaniya kay maglaslas man siya.

Unsa may akong buhaton? Palihog pasabta ko. Daghang salamat sa imong pagtagad.

* * *

Good day,

Yes duna gyoy mga tawo nga ingon niini ang taras. Nagsugod kini dili kay karon lang kondili niadtong mga bata pa sila. Wala kini mahatagi og pagtagad mao nga hangtod karon bisan dagko na sila anaa lang gihapon ang maong kinaiya.

Adunay bata nga kun maguol ug maglagot iyang iparok ang iyang ulo. Ang uban ilang birahon ang ilang buhok, ang uban lain ang pasakitan aron lang gyod mawagtang ang ilang kalagot.

Mao gyod kini ang iyang pangontra nimo kanunay tungod kay nagpakita man ka nga mahadlok ka sa iyang pagabuhaton. Apan kun magpakita ka nga dili ka maapektohan sa panahon nga maglaslas siya hayan lahi na pod ang iyang pangontra.

Kinahanglan nimo siyang pasabton nga dili gyod maayo ang inyong relasyon tungod kay lisod na ug gubot na kaayo kun masayran kini sa imong pamilya. -- Tita Salie