Nahipugwat si Regner dihang gipukaw siya sa iyang inahan. Day-off ni Regner matag Sabado mao nga wala dayon siya mobangon kay kini ra nga adlawa nga siya makapahuway pag-ayo kay walay trabaho.
“Anaay nangita nimo nga babaye, basin resulta na ‘sab kana sa imong kabilyako sa babaye,†matud sa inahan ni Regner. Miatubang usa si Regner sa salamin sulod sa iyang kwarto og giareglar kadiyot ang iyang panagway.
Nahibulong si Regner kon nganong may nangita kaniya nga babaye. Paggawas ni Regner sa iyang kwarto, nakita niya ang babaye nga naglingkod sa hawanan sa ilang balay.
“Good morning sir,†pangatahuran sa babaye kang Regner. Nakabantay dayon si Regner nga hitsuraan ang maong babaye, porma og lawas apan wala siya makahinumdom nga nagkakita na sila niini.
“Anak ko ni Rodrigo Antecristo sir, ang drayber sa PUJ nga imong nadakpan niadtong miaging adlaw,†matud sa babaye. Tuod, nahinumdom si Regner sa PUJ drayber nga iyang gidakop.
Gikarga niya sa TOP ang tulo ka violation niini nga nahimo kay abusado kaayo ang mao nga drayber. Lima na ka tuig nga traffic enforcer sa CITOM si Regner apan dili kaayo siya estrikto nga manakop.
Apan napugos siya pagdakop sa mao nga PUJ driver kay sa iyang kaabusado nakamugna kini og kaguliyang sa mga sakyanan. Misugat ang mao nga PUJ driver sa agianan nga para sa sakyanan sa pikas leyn.
Pagpangayo niya sa lisensya, dugay pa gayud nga mihatag ug sa ngadto-ngadto nasayran ni Regner nga expire diay ang lisensya niini. Ang drayber isog pa g’yud kaayo og sinultihan.
Gawas sa reckless driving ug driving with expired license, gibutang pa gayud ni Regner sa TOP ang pagsul-ob niini og sinelas samtang nagmaneho sa PUJ nga nagtangag og dako kaayo og multahan. “Nakahinumdom na ko miss. Anak ka diay sa abusado nga drayber nga akong gidakop. Nganong mianhi ka man nako miss?†kalma ang tingog ni Regner.
“Didto si Papa sa LTO kagahapon aron lukaton unta ang iyang lisensya apan mibalik kini nga minghoy. Dako kuno kaayo ang bayranan kay dul-an sa kwatro mil,†matud sa babaye.
Igo ra nga miyango-yango si Regner. Nasayod na siya nga dako-dako g’yud ang mabayran nga multahan sa iyang gidakop. Gituyo niya kini aron matudloan og leksyon sa iyang pagka-abusado nga momaneho’g sakyanan.
“Grabe kaabusado nga momaneho og sakyanan ang imong amahan miss,†giingnan niya ang babaye.
Nakahilak ang babaye sa atubangan ni Regner. Nakita ni Regner nga nangampak sa kaapingan niini ang mga lusok sa luha. Nalooy kaayo si Regner nga nagtan-aw sa babaye. – Sumpayan