Human ikahatud ni Jomar si Jelyn didto sa Labangon, mipauli na si Jomar sa iyang gipuy-an sa Barangay Punta Princesa. Dili kaayo layo ang lugar nga ilang gipuy-an.
Gitudloan ra si Jomar ni Jelyn sa ilang balay mao nga wala na lang usa manaug ang ulitawo. Alang kaniya dali ra nga pangitaon ang maong balay kay duol ra kini sa karsada.
Tulo ka adlaw ang milabay, adlaw’ng Domingo. Giadto ni Jomar si Jelyn sa ilang balay. Nakalitan ang dalaga kay wala kini magtuo nga mobisita kaniya si Jomar.
“Uy hala, dia ka lagi Mar?†matud ni Jelyn nga mora’g nauwaw kay wala siya makapangandam. “Giagi lang tika kay basin gusto ka nga manuroy ta, Domingo man karon,†iyang giingnan si Jelyn.
“Dili ka mauwaw nga makigkuyog nako? Mailhan na ra ba nga mabdos ko. Basin og maa-an ka nga imo ko’ng asawa,†matud ni Jelyn nga nagpahiyom. “Wala’y problema kun ila ko’ng pasanginlan nga ako’y nakapabuntis nimo, kanindot ra ah,†bawos-tubag ni Jomar.
Tuod naligo pagdali si Jelyn ug nag-ilis. Dali ra siya nga nakaandam ug human makapananghid sa iyang inahan, nanglakaw sila. Nakabantay si Jomar nga mitutok kaniya pag-ayo ang inahan ni Jelyn.
Nasabtan ni Jomar nga gipanid-an siya sa inahan sa iyang amiga. Nagtoo gani siya nga masuko kini nga makigkuyog ang iyang anak og lain nga lalaki karon nga mabdos na.
Tibuok adlaw sila nga nagsuroy-suroy si Jelyn sa lainlaing mga department store. Nalipay kaayo si Jelyn kay gipalitan siya ni Jomar og blouse nga alang na sa usa ka mabdos.
“Maikog man lang ko nimo Mar kay imo man ko gipalitan og mga sinena,†mauwawon nga tingog ni Jelyn samtang migunit kini sa bukton sa ulitawo.
“Way problema. Nindot ka man gud kaayo nga panggaon. Mosugot ka man kaha nga akong panggaon Lyn?†gisukna ni Jomar ang dalaga. Wala kini motubag apan igo lang mipahiyom ug mitan-aw kang Jomar. Nakabatyag hinoon si Jomar nga gipig-it ni Jelyn ang iyang bukton.
Ang makakita kanila magtoo gayud nga aduna sila’y relasyon kay loving kaayo sila’ng duha tan-awon. Sa wala pa sila mamauli gikan nga nanuroy, nangaon usa sila.
Gihatud ni Jomar si Jelyn. “Salamat kaayo Mar ha sa pagpalit nimo nako og mga sinena?†ni Jelyn pa nga paraygon na kaayo kang Jomar. Gitutokan niya ang dalaga sa wala pa kini manaug.
Nagtinutokay sila’ng duha ug takulahaw lang nga anam-anam nga nag-abot ang masi’g nila ka mga ngabil. Nag-ukobay kini nga tugob sa pagmahal. “Bye Mar.†“Bye Lyn.†- Sumpayan