Maayo’g sales talk

“Sir, mag-good time ta. Librehon tika’g motel. May credit card man ko. Ikaw la’y bahala sa akong serbisyo,” matud sa maanyag ug seksi nga babaye daplin sa karsada nga inilang daghang indayhilay.

Atol nga giablihan ni Nestor ang bintana sa iyang gimanehong kotse kay nangluwa siya. Nag-aginod man sab gud iyang sakyanan kay may traffic jam niadtong tungora nga bag-o lang ni alas singko sa hapon. Nag-aginod ang dagan sa sakyanang gimaniho ni Nestor. Nahiagi siya ining dalana kay nangala  iyang asawa. Nagpapalit og putahe sa paborito niyang restawran dinhing dalana.

Nakugang si Nestor. Kay karon pa siya hagda’g babaye nga ingon niini. Kasagaran magtan-aw tan-aw lang ni sila. Igo lang mohikohiko. Unya sabtunon ang lihok ug tinan-awan.

Kining bayhana, kursunada na gyud kaayo. Hi-tech pa’g tanyag. May credit card. Apan sukad pa kaniadtong ulitawo pa siya.

Wa gyud siya nisuway og ingon ining babaye. Nahadlok siya’g masakit og AIDS o ubang matang sa sexually transmitted disease. Nanguyab lang siya’g maid nga kauban sa balay sa iyang amo. Kay family driver man siya.

Daghan siyang natilawan nga mga maid. Way nabuntis. Kining iyang naasawa, maid gihapon. Apan pinakaguwapa sa tanang maid. Napugos lang siya’g pangasawa kay nabuntis man. Unya nadutlan na gyud siya sa pulong gugma. Swerte kay gipapuyo lang gihapon sila’s servant quarter sa balay sa ilang amo.

Gitutokan niya ang babaye. Madanihon gyud kaayo bayhana. Tagsa ray lalaki makabalibad ini. Kun di lang si Nestor minyo ug mabdos ang asawa, kuyaw og matental siya. Di siya gustong mainsultuhan ang babaye. Ayohon lang niya’g balibad.

“Di lang sa karon, day. Kay may problema ko,” ni Nestor.

“Unsang problemaha, sir? Sulbaron natong duha?” sa babaye. Pinahiyong ang mata’ng nitutok niya.

“Duna ko’y gonoreya,” ni Nestor. Niping-it. Ang iyang tumong, aron mahadlok ang babaye.

“Ok lang, sir. Duna man sab ko,” sa babaye. Mapahiyumon. Maayo gyud og sales talk.”

“Butangi!” tuaw niya sa hilom. Kakataw-unon.

“Beep Beep,” Nibusina ang sakyanan sa luyo ni Nestor. Layo na diay ang sakyanan iyang gisundan. Wa na lang siya nitubay sa babaye. Nipasirit na lang siya’g  padagan. (Katapusan)