Isla Paraiso

Gula 47

Paghunong sa taksi nga gisakyan ni Rey tungod gayod sa gate nga puthaw sa Orchids Sisters Convent, mao usay pagbundak sa makusog nga ulan. Gibayran ni Rey ang driver sa kantidad nga giyamar sa metrohan sa taksi ug dayon nanaog. Nagpatubas siya sa ulan. Mipaduol siya sa gate sa koral nga semento sa kombento sa mga madre.

“Sister Veronica,”  misinggit si Rey sa pagsangpit sa madre. Nahumod na siya sa ulan. “Sister Veronica, gawas diha sa kombento.”

Apan mingaw na ang sulod sa kombento. Ingon sa nahinanok na gayod ang tanan sa sulod. Ilabi na nga kusog usab kaayo ang pagbunok sa ulan, mosamot nga dili hibatian ang tingog ni Rey didto sa sulod.

“Sister Veronica!” Miusab pagsinggit si Rey nga sa matag karon ug unya, modapuwas sa iyang palad sa mga tubig sa iyang nawong. “Gimahal ko ikaw, sister Veronica!”

Milabay ang mga gutlo. Nagpadayon pagbunok ang ulan. Si Rey wala mobiya sa tungod sa gate sa kombento nga nagpunay’g sangpit sa ngalan ni sister Veronica. Hangtod nga kaha diha may nakabati sa iyang pagsangpit, mihayag ang sala sa kombento sa gipasiga nga sugang dagitabnon.

Pagkataudtaod, mihayag usab ang lawak sa ikaduhang andana sa kombento. Unya, naabli ang bentanang jalousie. May bayhon sa usa ka babaye nga milili sa bentana. -- Sumpayan pa