Tingog ni Tatay among pinaskohan

Pasko. Kun kanus-a nga nangandoy mi’g pansit ug pandesal  nga among saw-an inig human namo’g panimba sa misa nga alang sa pagsugat sa pagkatawo sa atong Ginoo, mao po’y pagkatapos sa bilding nga gitrabaho nilang Tatay Andot, diin moduha na ka semana ang nakalabay, wala na gyud siya makakita’g bag-o.

Panihante lang si Tatay. Iyang suweldo kada semana igo ra gyod ikapalit namo’g kunsomo sa maong gidugayon. Maayo na lang gani nga miabag si Nanay Totang pagpamaligya’g kokonat kendi, bukhayo ug tiratira sa sayidwok, nakasalbar kini alang sa among inadlaw’ng pagkaon nga pirme lang intawong tsampurado pinaresa’g bulad o ginamos. Sa adlaw sa Pasko ra kaming makatilaw’g arang-arang. Makakaon lang kami’g pansit ug pan desal, payits na!

Apan sa grabeng pagtaas sa presyo sa mga palaliton, pun-an pa nga wala nay trabaho si Tatay Andot, segurado gayod nga wala mi pansit ug pan desal niining Paskoha. Maminaw na lang kami sa inaringkil sa mga tinidor ug kutsara sa among silingan nga malipayong nangao’g litsong baboy, kalderitang kanding, stem lapulapu ug uban pang lamiang pagkaon sa ilang Noche Buena. Ayawat na lang maapil mi’g kabusog sa humot sud-an among masingo nga dinala sa bugnaw’ng hangin.

Duha ka oras na lang ang paaboton ug manimba na kami. Apan wala pa man si Tatay Andot? Adlawan pa siyang nawala sa among balay, unya hangtud karon wa pa man mahiuli? Hain kaha siya, no? Bahala’g wa mi’y pandesal ug pansit nga saw-an, ang importante nga makatambong ming tanan sa misa gikan sa pagsugod hangtod sa pagkahuman. Bahala na’g ahaw sa pagkaon among lawas, basta busog lang sa espirituhanong kalan-on among kalag.

Napakgang ang paglatagaw sa akong hunahuna dihang miigot ang salo’g namong kawayan. May miabot. Milingi ko. Ug nakit-an ko si Tatay nga may dalang plastic bag samtang ang wala niyang kamot nagbitbit og yukelele. “Diin man ka, Tay? Tagbaw baya mi’g paabot nimo, do!” Sugat sukna ko sa gipangga namong amahan.

“Ay, daaa...nangita’g pagkaon nga atong masaw-an ini’g human nato’g simba.” Dayong hikyad niya sa lamesa sa tanang sulod sa plastic bag, diin mialisngaw pa ang kainit-kahumot sa liyempo, ang nag-aso-aso pang pancit canton ug pan desal. Unya may mga papel de banko pa gyod siyang gihapnig.

“Diin man na gikang kuwartaha, Tay?” Nako pa pagkakita sa tag P20 ngadto sa P100 nga gihapyodhapyod sa mga tudlo niini.

Pahiyom ray gitubag ni Tay Andot dungan ang pagkugos sa iyang yukelele ug dihadiha malipayong mikanta og: ‘Give Love On Christmas Day.” Gisundan pa gyo’g: ‘Have Yourself A Merry Little Christmas.”

Mitulo akong mga luha. Dili sa kaanindot ug kabugnaw sa tingog ni Tatay. Kun dili, dihang gipahibalo mi niya nga solo diay siyang nanaygon sa kabalayan ug dagkong mga tindahan. Ug didto pa ako makasabot diin gikan ang among pinaskohan nga gusto niyang ihatag namo niining Paskoha. (Katapusan)