Gunting-guntingon

Dear Tita Salie,

Hello everyone and good day kanimo, Tita, ug sa tanan nga tigbasahan og Banat News and pasabta. Just call me Ms. Taurus, 32 years old ug usa ka minyo. Ang akong problema mahitungod kini sa akong bana nga dili matupngan ang pagkaseloso.

Dili gyod ko kasabot kaniya, Tita, tungod kay wala man unta ko’y gibuhat nga daotan nga angay niyang selosan. Magselos siya bisan kun sugoon lang ko sa akong mama. Siyempre ako mama ang misugo nako ug ako gyod kining buhaton. Masuko siya kun molakaw ko, magselos dayon siya. Kun mangimbitar ang akong mga amiga mas grabe ang iyang kasuko, bisan pa man kun mananghid ko niya. Kun medyo madugay ko sa pag-uli, iya dayon nga gunting-guntingon ang akong mga senina. Wala gyod ko kasabot, Tita, kun nganong ingon siya niini ug wala ko masayod kun unsay akong buhaton. Palihog pasabta ko. Thank you.

* * *

Dearest Ms. Taurus,

Lisod ug dili gyod lalim kun kita maka-partner og selosong tawo. Mas maayo pa ang ordinaryong sakit sa lawas kay puwede pa nato kining dapatan og tambal aron moarang-arang ang atong paminaw sa lawas. Apan ang tawong seloso lisod i-determine kun unsa gyod ang angay nga buhaton aron mawagtang ang iyang pagkaseloso. Tungod kay siya ra gyod ang makatabang sa iyang kaugalingon aron dili na siya magselos.

Kinahanglan gyod nga iyang i-convince ang iyang kaugalingon nga mosalig siya kanimo nga buotan kang asawa ug iyang ibutang kanunay sa iyang hunahuna nga siya ra gyod ang imong gihigugma kay bisan pa man kun unsay imong buhaton kun siya wala mo-cooperate o motabang aron masulbad ang inyong problema wala gyo’y mahitabo, ug magpabilin gyod ang iyang pagkaseloso.

Sulayi kuno nga sa imong mga lakaw dad-a siya o pakuyoga siya aron dili mag-rigor ang iyang utok. Kun sugoon ka sa imong mama pakuyoga siya, kun adunay invitation ang imong mga amiga, ipaapil siya og invite aron makakita gyod siya sa inyong gipangbuhat. Kay moabot ra unya ang time nga lainan siya kay siya ra ang lalaki nga nakigkuyog sa grupo sa mga babaye. -- Tita Salie