Bag-ong Tuig, bag-ong pinitik
Sukad mabilanggo si Danny wala gyod moduaw kaniya si Elizabeth. Si Elizabeth iyang hinigugma ug ig-agaw ni Peter nga gipatay pipila na ka bulan karon ang nakalabay ug si Danny ang gipasanginlan kay siya man naaktohan sa mga tanod nga nagbarog duol sa patay’ng lawas ni Peter.
Ug tungod tingali kay nagduda pod si Elizabeth nga siya ang mamumuno sa ig-agaw niini maong wala na lang kini mopatim-aw dinhi sa bilanggoan aron pagduaw kaniya.
Duha na ka tuig ang ilang relasyon ni Elizabeth apan bisan pa niini, mora’g mauwaw ang dalaga nga moangkon nga may relasyon silang duha. Tungod tingali kay dato sila si Elizabeth ug ang ilang kahimtang igo-igo lang sama sa uban nilang mga silingan dinhi sa ilang balangay.
Ning tungora kahilakon si Danny kay sunod adlaw mao na ang Bag-ong Tuig ug anhi gyod siya mamag-ong tuig sulod sa prisohan. Apan dili siya ang matuod nga kriminal. Gani, nakita man niya ang tawo nga midagan sa pagduol niya kay nabati man niya ang singgit sa pakitabang ni Peter.
Ug mao tong iyang hiabtan nga nagtaop sa dughan niini ang usa ka hait nga punyal ug nabulit sa kaugalingong dugo si Peter.
Pait kaayo ang palad niya karong naangkon, nabilanggo sa sala nga wala niya mabuhat. Unya, may miduol kaniyang polis nga nagpahibawo nga may bisita siya.
Ug dihang miadto siya sa may dawatanan sa mga bisita dinhi sa prisohan, maoy iyang nakita si Margarita, ang dalaga nga ilang silingan. Maypa si Margarita nga dili niya hinigugma ug unya silingan lang niya miduaw kaniya dinhi sa bilanggoan. Nagdala kini’g mga pagkaon.
“Gidad-an tika’g mga linuto nakong mga pagkaon, Dan,†ni Margarita pa nga mora’g magul-anon ang hitsura nga nasubo usab sa iyang pagkabilanggo.
“Salamat, ha, Rita, nga imo kong giduaw dinhi. Maypa ka nakahunahuna’g duaw nako dinhi, pero si Elizabeth, wala gyod moanhi nako dinhi....†hinay ang tingog ni Danny.
“Sige lang god, Dan, wala tingali lugar. Kuan, diay ayaw lang og kasuko, ha, akong nakita si Elizabeth ug Sandro nga nagkuyog. Mora’g adto kadto sila paingon sa siyudad...†matud ni Margarita.
“Mao ba. Okey lang. Basin og iya na kong giilisan, sila na karon si Sandro. Aw, bagay man sila, pulos sila mga anak tubigtubigan dinhi sa ato,†mora’g kahilakon si Danny. Unya, human sa ilang panagkabildohay ni Margarita, nananghid ang dalaga nga molakaw na. Igo na lang ginuntan ni Danny si Margarita sa iyang panan-aw nga milakaw na. Kini si Margarita suod niyang higala, ug gusto gyod nga magkasuod sila.
Gani, kun wala siya’y kuwarta adto man siya mohuwam sa dalaga, kay nagaluto man kini’g bingka, bodbod, ug kun ting-ulan magluto kini’g binignit ug uban pang matang sa pagkaon nga alang lang sa mga pamainit. Napugwat si Danny sa sangpit sa polis nga mipahibawo kaniya nga makagawas na siya sa bilanggoan.
“Makagawas ka na, Mr. Bunghanoy, kay misurender na ang tinuod nga nagpatay kang Peter. Gawasnon ka na, ug Happy New Year na lang nimo,†sa polis pa nga miabli sa pultahan sa puthaw’ng rehas. Wala tuyoang miagas ang mga luha ni Danny sa iyang kasayoran, ug sa hilom nagpasalamat siya sa Ginoo.
Pagbagting gyod sa taknaan sa tungang gabii sa alas dose na ang takna, mipaka dayon ang mga butobuto sa mga kuwitis, rebentador ug unsa pa kanang matang sa pabuto. Bag-ong Tuig na! Nia siya karon sa tugkaran nilang Margarita kay atbang ra man ang balay sa dalaga sa ilang balay.
“Happy New Year, Danny,†tugob sa pagbati nga namulong si Margarita.
“Happy New Year pod kanimo, Margarita,†niya pa usab kansang kasingkasing miabli ang bag-ong pinitik, bag-ong gugma alang sa dalaga. Ug iyang gikuptan ang malumong palad niini. (Kataposan)
- Latest
