Maanyag nga bakwit

Gula 5

Atubangan sa guwardya nga nagbantay sa main entrance, nagginaksanay sila si Ariel ug Mirasol. Mga tulo lang ka semana nga wala sila magkita apan daw pipila na ka buwan ang ilang panaglay-anay.

Klaro kaayo nga usa’g-usa kanila naghambin og dili matukib nga kamingaw. Daw nahimong lumo ang kasing-kasing ni Ariel kay nakahilak siya samtang nagginaksanay sila si Mirasol.

“Salamat g’yud nga mibalik ka Mir, I miss you so much,” wala’y kukauwaw nga giangkon ni Ariel ang iyang kamingaw ngadto sa dalaga. “Ako ‘sab Ariel, gimingaw pag-ayo sa imong kabuotan ngari nako mao nga mihangyo g’yud ko nila ni Papa ug Mama nga mobisita nimo dinhi sa Cebu,” ni Mirasol pa.

Gipauban ni Ariel si Mirasol pag-adto sa Tinago Sports Complex. Duna pa’y mga kaila si Mirasol nga didto nagpabilin sa pag-estar ug natingala kaayo kini sa pagbalik sa dalaga.

Human matuman ni Ariel ang gisugo sa iyang boss, mibalik dayon sila sa opisina. Didto ra si Mirasol sa visitors’ waiting area naghuwat kang Ariel hangtud nga mi-off kini pagka hapon.

“Dad-on tika sa balay Mir, unya manuroy ta kay Biyernes man, ugma Sabado wala’y trabaho,” ni Ariel pa nga mialsa dayon sa bag sa dalaga. Gipaila-ila ni Ariel si Mirasol sa iyang inahan.

“Buotan man diay ang imong inahan Ariel,” ni Mirasol pa. Human sila makapanihapon, nanuroy sila si Mirasol ug Ariel. “You know Mir, happy kaayo ko nga gikauban ko na ikaw karon,” matud ni Ariel.

Kanunay na nga agbayan ni Ariel si Mirasol ug gipakita na gayud niya sa dalaga ang iyang pagpangga. “Dili na ako gusto nga mahanaw ka pa kanako Mir. Abi mo, sa mga adlaw nga wala ko na ikaw makita, mora’g haw-ang kaayo ang kalibutan para kanako,” ni Ariel pa samtang nanglingkud sila sa Fuente Osmeña.

“Ingon usab niana ang akong gibati Ariel dihang didto na ako sa Manila,” matud ni Mirasol nga miparayeg kang Ariel. Gigakus ni Ariel si Mirasol ug gihagkan.

Karon pa makabantay nga si Mirasol nagsul-ob diay sa T-shirt nga iyang gipalit para sa dalaga. Gikan sa Fuente Osmeña nagdisco pa ang maghigugmaay. “Malipayon kaayo ko uban  kanimo Ariel,” ni Mirasol pa.

Sa ilang pagpauli. “Asa man ko nimo pahigdaon Ariel?” ni Mirasol. “Ang-ang man og mosugot ko nga mohigda ka nga ikaw ra, magtupad g’yud ta sa paghigda adto sa akong kwarto,” ni Ariel.

Wala motingog si Mirasol apan migakus kini pag-ayo sa hawak sa iyang boyfriend. Gakus nga klaro kaayo nga tugob sa kamingaw. Nanulod dayon sila sa kwarto ni Ariel. - Kataposan