Maanyag nga bakwit

Gula 4

Mora’g nabag-ohan si Ariel nga wala na niya makauban pa si Mirasol human kini makalarga paingon sa Manila. Usahay dili lang makamatngon si Ariel nga nagsigi na diay siya’g hinuktok nga wala gayod sa kaugalingon.

Malipay na lang gani siya kun makontak niya si Mirasol apan hinay ang network sa selpon sa dalaga didto sa dapit nga iyang nahimutangan. Hangtud nga wala na gayod sila magkakontakay.

Miabot ang higayon nga wala na mag-field pa si Ariel. Ang mga kawani na lang sa Department of Social Welfare and Services (DSWS) sa dakbayan sa Sugbo ang miatiman sa mga bakwit nga gikan sa Tacloban.

Nagkaduol na gayud ang Pasko. Human sa kapoy kaayo nga trabaho sa pag-atiman sa mga bakwit nga gikan sa Tacloban, gusto unta ni Ariel nga mobakasyon apan kinahanglan pa nga mananghid siya sa iyang labaw.

Nagkaduol na gayud ang Pasko. Sa mga higayon nga ikauban ni Ariel ang iyang mga barkada, usahay mapugos siya sa pagpahiyom kay sungogon man siya nga nagpadala sa iyang pagbati.

Daku g’yud ang pagmahay ni Ariel nga wala pahimudsi ang higayon nga sila magmalipayon ug si Mirasol sa dihang dinhi pa sa Sugbo ang dalaga.

Milabay pa ang laing mga adlaw. Mao g’yuy paggawas ni Ariel sa opisina sa iyang boss kay gimandoan siya nga bisitahan ang mga evacuees nga atua sa Sports Complex sa Tinago.

“Ariel nanawag ang guard sa entrance kay adunay nangita nimo,” giingnan si Ariel sa iyang kauban sa opisina. “Kinsa kaha ang nangita. Molakaw pa ra ba ko miss kay gisugo ko ni boss pag-adto sa Tinago sports complex,” ni Ariel pa.  

Gibitbit ni Ariel ang iyang gamay’ng bag aron mopaingon na sa Tinago. Sagad g’yud unta nga sila nga mga kawani kun mogawas adto sila moagi sa personnel exit.

Apan nakahinumdom si Ariel nga may nangita man diay kaniya didto sa main entrance. Napugos siya nga adto moagi bisan og likoon na kun adto siya mogawas paingon sa Tinago.

“Kinsa ang nangita nako guard?” gisukna ni Ariel ang gwardya. “Ariel, ako’y nangita nimo! Kumusta ka na Ariel!” maikagon nga singgit ni Mirasol ngadto kang Ariel.

“Mirasol!” daw nalumsan sa kalipay ang kasing-kasing ni Ariel nga nakakita sa bayhon ni Mirasol. “Nganong dia ka sa Cebu?” gisukna ni Ariel ang dalaga.

Mipahiyom ang dalaga nga misud-ong ni Ariel. “Dili ka ba diay malipay nga akong bisitahan? Love man kaha ko nimo? Dili ba giingnan man ko nimo nga I love you sa dayon nako nga paggikan?” matud ni Mirasol. - Sumpayan