Nakahibalo si ate

Dear Tita Salie,

Maayong adlaw ug komusta? Just call me Ms. E.L., still single. My problem is all about my life, and my situation karon, tungod sa akong ex-boyfriend.

Kining akong ex, Tita, siya gyod ang unang lalaki nga akong gihatagan sa akong pagkababaye. Tungod lagi sa dako nakong gugma ug pagsalig ako kadtong nabuhat. Wala ko magdahom nga iya ra diay ko nga gibinuangan ug dili tinuod ang iyang pagbati.

Karon duna nako’y laing uyab ug nasayod siya sa tanan mahitungod sa akong ex kay ako mang gisulti kaniya ang tanan ug malipayon ko nga iyang nadawat ang akong  pagkababaye.

Wala ko masayod, Tita, nga gipanabi usab diay sa akong ex ang nahitabo kanamo nga nakuha nako niya. Sa akong kalagot ako siyang gitawgan, apan matud niya nga wala na siya’y labot niini.

Ang nakapait karon kay nasayod na niini ang akong ate ug perti niyang sukoa kanako. Nahadlok nako karon, Tita, ug wala ko masayod kun unsay akong buhaton. Palihog pasabta ko. Thank you very much and more power.

* * *

Dearest E.L.,

Wala kay sala nga niabot ngadto sa imong ate ang balita. Ang nahimo nimong sala mao ang imong pagtugyan sa imong kaugalingon sa dakong kasayon. Kun nganong wala nimo hunahunaa ang imong kaugalingon nga maguba kini tungod sa imong gibuhat. Labina karon nga nasayran sa imong uyab ang nahitabo ninyo sa imong ex. Maayo na lang kun seryoso kanimo ang imong boyfriend karon ug dili ka niya binuangan.

Ang maayo nimong buhaton mao nga bisan kun nahatag na nimo ang virginity, usba ang imong estilo sa kinabuhi. Hatagi’g  importansya ang imong kaugalingon ug dili na nimo buhaton ang imong nabuhat nga sayop sa una. Human kana nasayop busa ayaw na kini usba. Aron dili ka mamahimong alaot sa umaabot.

Maoy timan-i nga ang tinuod nga gugma dili mapahimuslanon ug andam kining magpaabot sa hustong higayon. Busa pahuwata ang imong uyab.

Wala kana’y mabuhat ngadto sa imong ate gawas sa pagpangayo og pasaylo kaniya sa sayop nga imong nabuhat tungod sa imong gugma sa imong uyab. Ug ayaw na gyod kini buhata pag-usab. --  Tita Salie