Isla Paraiso - Gula 39

Sa dihang nakadunggo na ang lantsa, may pipila sa tawong armado nga nanaka sa maong sakyanan sa kadagatan. May mga tripulante usab sa maong lantsa nga nanganaog. Wala madugay, gisugdan ang pagdiskarga sa mga kontrabando.

Sanglit daghan ang mga lumilihok, kadali rang nahuman ang pagdiskarga sa mga kontrabando. Gisunod gilayon ang pagbinayranay.

“Wala’y mopakita’g dautang lihok!” ang tagning nga tingog ni SPO3 Rey Corpuz kalit milanog sa kalikopan nga nakapakugang sa mga tigpayuhot. Migamit si Rey og megaphone. “Gilibotan na sa kapolisan kining inyong nahimutangan. Ampo kamo nga malinawon aron wala’y daotan nga mahitabo kaninyo.”

Wala’y usa sa tigpayuhot nga nakalihok. Ingon sa wala gayod sila magdahom nga may mga polis nga nakatiktik sa ilang shipment karong gabhiona.

“Usbon ko,” milanog na usab ang tingog ni Rey diha sa megaphone, “gilibotan na sa daghang mga tinugyanan sa balaod kining beach resort. Wala’y kapuslanan ang pag-ikyas. Ug labaw nang wala’y kapuslanan ang pagsukol. Busa itahan nga malinawon ang inyong kaugalingon kanamo.”

“Dili kami ingon niana ka tonto!” Usa sa mga tigpayuhot ang misinggit dungan ang pagpaarak sa armalayit niini ngadto sa kapolisan.

Ang mga tinugyanan sa balaod abtik nga namasalipod. -- Sumpayan pa