Isla Paraiso

Gula 32

Sa lamesa ni Rey sa opisina nagtipun-og ang mga kaso nga gidangop ngadto kaniya ug buot siyang masulbad na ang mga salawayong buhat sa dakbayan sa Sugbo nga gihimo sa daghang mga badlungon sa katilingban.

Human katrapohi ni Rey sa limpiyong panapton ang bildo nga hapin sa iyang lamesa, giunlod ni Rey ang iyang kaugalingon sa swivel chair. Daklit niyang gitutokan ang nagkadaiyang butang nga gipatong sa iyang talad-buhatan. Sa walang kilid nahimutang ang telepono. Sa iyang atubangan, diha ang kahoy nga may igong gidak-on nga gikulitan sa iyang kompletong ngalan SPO3 Rey Corpuz, Thief and Robbery Section. Sa tuong kilid sa iyang talad, nagtipun-og ang daghang folder nga giundan sa mga papel nga gisulatan sa daghang mga kaso nga wala pa masulbad. Nakapanglingolingo si Rey samtang nagsud-ong niini.

Unya gikawhat niya ang folder nga maoy nahimutang sa kinaibabwan. Giukab kini. Gibasa ang kaso nga nahisulat sa papel.

Unya kalit miungot ang iyang mga mata sa gitamdan nga papel. Napantok ang iyang panan-aw sa hulagway nga gipapilit sa tuong bahin sa ibabaw sa papel. Ingon sa nakita na niya ang maong tawo. Dili lang niya mahinumdoman kun kanus-a sila nagkita. Basta may pagbati siya nga nakita na niya ang maong tawo dili pa kaayo dugay.

Gisulayan niya’g hinumdom kun diin makita ni Rey ang maong tawo. -- Sumpayan pa