Impostor

Naproblema si SPO3 Ike Meron pagmata niya karong buntaga. Gihilantan siya. Labad iyang ulo. Nanakit iyang kalawasan. Gipanugnaw siya. Gitakboyan tingale siya’g trangkaso. OK lang unta kun mopahuway siya. Mopalta sa trabaho. Apan isip traffic investigator, duna siya’y gitakda nga seminar sa mga drayber karong adlawa. Karong alas dos sa hapon sa auditorium sa Camp Carlos Romulo. Dili sab siya ganahang mopalta. Kay anugon ang honorarium. Dakodako ra ba. May nahunahunaan siya.

Gipukaw niya iyang manghod nga si Peter nga nagtungha og BS Psychology. Naa pa sa ikatulong tuig.

“Psychology student man gyud ka. Kaya nimo ang mag-lecture. Tamdi lang akong mga notes ug print out sa computer,” ni Ike.

“Di ko, manoy oy! Mabisto pa lang ko nga dili ikaw. Kuyaw og makiha tang duha!” ni Peter nga naglingkod sa katre. Nanghimuta pa.

“Ay’g kahadlok. Akong mga kaubang pulis, di kamatikod. Kay nila pa, mora kono ta’g kaluha. Pagkawo lang og baseball cap. Unya pag-shades” sugyot ni Ike.

“Na hala. Di ba kaha mahibung imong mga kauban unya, nga nalahi ang imong diskarte. Kay lain man gyud ko’g estelo sa pag-seminar,” ni Peter. Nikilo lang si Ike.

“Tungaan ta unya kas honorarium” pasalig sa maguwang.

Napugos ang manghod pagtuman sa misyon gihatag sa maguwang. Kay suod kaayo silang managsoon. Sila rang duha. Ug ilo na sa ginikanan. Biktima ilang ginikanan sa flash flood sa Ormoc hapit 20 ka tuig na ang nakalabay. Nag-self supporting si Ike sa pagtungha og Criminology hangtud nahimong pulis. Karon, siya na  ang nagsuporta sa pagtoon sa manghod.

“O, manoy o. Tan-awa sa computer kay gi-videohan ko sa imong mga kauban. Nibilib kono sila sa bag-ong estelo nimo” ni Peter nga mapahiyomon. Nagtunol og CD sa maguwang paghiuli nianang sayong gabii.

“Bisa’g unsang problema sa katilingban, naggikan ra na sa atong kinaiya. Batasan, sa Ingles pa, attitude. Problema sa heavy traffic, traffic violation ug disgrasya tali sa mga sakyanan, ang kasagarang hinungdan ana, atong kinaiya. Kay di ta kamao mohatag og higayon sa uban. Nagtoo ta nga kita ray tag-iya sa karsada. Sa pagkatinood, ang karsada, sa gobyerno. Apan ang gahum sa gobyerno, gikan kanato -- mga tawo. Bisan kitang tanan ang tag-iya sa karsada. Apan tungod ba nianang katarungana, magdungan ta’g agi sa karsada? Magbinanggaay gyud ta. Magbanos-banos ta og agi. Kun ngil-ad ka’g batasan nga pagkatawo, ngil-ad sab ka’g batasan nga pagka-drayber. Kun dawo ug bintahoso ta nga pagkatawo, mao sab ta nga pagka-drayber. Kun manggihatagon ka nga pagkatawo, manggihatagon ka nga pagkadrayber.  Busa, akong sugyot nimo, aron maminusan ang heavy traffic, traffic accidents ug violation, defensive driving atong gamiton. Tahuron nato ang mga traffic rules ug traffic signs. Andam tang mopasaylo sa nasipyat nga laing drayber. Andam ta mohatag higayon nga mouna ang bisa’g dili angay paunahon. Kun nagdanghag ang laing drayber, kita dili. Aron malikayan ang disgrasya. Mahitabo lang ang disgrasya kun kamo nang duha ang nagdanghag,” ni Peter nga nagdiskorso atubangan sa gatosan ka mga drayber nga giseminar.

Nahinuklog ang mga drayber nga naminaw. Nakita ni Ike sa screen sa iyang computer sa iyang lawak pagpasalida sa CD.

Nakaapir siya sa iyang manghod. Wa siya magdahum nga tukma diay ang Pschology sa maong seminar. “Kumusta man akong mga kaubang pulis? Way nagduda nga dili ako ang nag-lecture?” ni Ike.

“Wa na sila’y panahon sa pagduda. Kay gituyo nako ang pagpa-late og diyes minutos” ni Peter.

“Angayan sab gyud kang mag-pulis anang imong kamarunong” ni Ike. Ug nag-apir na sab sila. (Katapusan)