Way rehab-rehab

Dili ako angay pangayoan nimo’g pasaylo. Ang biktima gyud. Manghod ra ko’s biktima!” ni Romy ngadto ni Merto nga hapit na lang moluhod sa atubangan sa nauna.

Nidali og sulod si Merto sa pultahan sa balay ni Romy, pag-abli niini. Ug nipasalipod dayon sa palid sa pultahan. Duna nay orden de aresto (warrant of arrest) batok ni Merto nga gihuptan sa opisina sa pulis sa ilang barangay. Naghulat lang ang mga pulis og tip nga niuli si Merto. Niuli gyud siya. Kay namatay iyang amahan. Motambong siya sa haya. Apan nahadlok siya nga arestahon ug di gani unya makaabay sa lubong.

“Ang akong hangyo, ayaw lang una pahibaw-a imong maguwang nga si Charlie, nga nia ko. Bisa’g unya na lang ini’g huma’g lubong ni Papa Lucio,” ni Merto sa pinahunghong nga tono.

Ning sayong kahaponon, gipasulod ni Romy si Merto ug gisirad-an dayon ang pultahan. Aron way silingan nga makakita niya. Kababata sila si Romy. Apan tungod sa kaadik ni Merto og shabu, nakat-on og pangilad. Daghang silingang nabiktima niya.

Ang iyang modus, motanyag nga mo-repair og mga aplayansis sama sa TV, stereo, karaoke, refrigerator ug aircon. I-pull out ang gamit unya mangayo’g kuwarta para palit og pisa. Way pisa mapalit. Way repair mahitabo. Mawala pa ang aplayansis. Mahanaw sab ang kuwarta ug ang repair man. Bisa’g tua nas laing baryo puyo si Charlie, nabiktima sab. Nisalig kay kaila lagi. Unya daghan pa gyung mga silingan ni Charlie nga nabiktima. Kay gidala ni Merto ang ngalan ni Charlie, nga konohay, ig-agaw sila. Bisa’g way igbahong paryente.

Gipasakahan ni Charlie og kasong ESTAFA. Unya, nalutsan og warrant of arrest. Imbis dos mil pesos ray nawala ni Charlie, ug iyang TV, nikabat nag duol diyes mil iyang gasto, tungod sa bayad sa abogadong nihimo sa mga affidavit ug filing fee pa. Gustong ipadakop niya si Merto aron matudloan og leksiyon. Wa siya nadakpi kay nagtagotago. Katapusang nasayran ni Romy, tuas Merto sa Leyte sa lugar sa iyang asawa. Tulo ka tuig na iyang warrant nga wa naimponer.

“Nakasabot ko’s imong situwasyon. Namatyan god ka” ni Romy.

“Salamat” ni Merto.

“Unya, nadatu ka’s imong pagpangilad?” ni Romy.

“Wa na gyud ko nangilad sukad giteksan ko ni Manoy Carlo nga dakponon na ko,” ni Merto.

“Unya? Unsa na mang panginabuhi imong gisudlan?” ni Romy.

“Nag-abli ko’g repair shop sa Leyte. Tininood na gyud akong pang-repair. Apan wa gihapo’y nahimo. Gigabaan gyud ko’s akong mga biktima,” ni Merto. Minghoy.

“Unsa man diay nahitabo nimo?” ni Romy.

“Nangasakit akong asawa’g mga anak. Wa ko’y natigum. Nakautang-utang pa ko” ni Merto.

“Mao nay resulta sa kuwartang pinaspasan. Gipakaon nimo imong pamilya sa kuwartang dili gikan sa tinarong paagi. Ako, agwanta lang og drayeb og taksi. Basta tinarong lang panginabuhi” ni Romy.

“Naleksiyon na ko. Nibiya na gani ko sa drugas. Kay mao may nakaingon sa tanan,” ni Merto.

“Nagpa-rehab ka?’ ni Romy.

“Way rehab-rehab. Basta hugot sa imong hukom nga mobiya, disiplina lang gyud. Usa ka tuig na kong wa katilaw og shabu” ni Merto. Mapasigarbohon.

“Sa ato pa, nagbag-o ka na’s imong kinabuhi?” ni Romy. “O, bay Rom” ni Merto. Gibati’g kalooy si Romy sa higala.

“Sigi bay. Di ko mopiyait sa pulis nga nia ka. Apan kun madakpan gihapon ka, ipasalig nako nimo nga dili ako nihatag tip sa pulis. Kay daghan sab baya ka’g biktima dinhi’s ato,” ni Romy.

“Salamat, bay. Puwede unya na lang ko mogawas kun mongitngit na?” ni Merto.

“Ikaw bahala” ni Romy. Apan gibati’g kabalaka nga masayran unya sa iyang maguwang nga siya pa ang nagtago ni Merto. Nanghinaut lang siya nga makasabot ra sab iyang maguwang inig abut sa hustong higayon.  (Kataposan)