Pagdagsang sa mga bakwet dinhi sa Sugbo

Ang nahitabong trahedya sa Tacloban ug sa ubang dapit sa Kabisay-an tungod sa kabangis sa bagyong Yolanda makapahinuklog gayod kaayo. Gawas sa gutom ug kauhaw sa mga tawo nga nangabiktima ingon man ang pagkawala sa ilang pinuy-anan kay gibanlas sa storm surge ug gigun-ob sa kusog nga hangin, nag-antos usab sila sa langsa nga kabaho sa mga patay nga wala dayon maatiman sa paghipos.

Angay lang tuod silang tabangan. Isip Kristiyano, daw hilapon ang atong kasingkasing sa kaluoy kanila. Gani, daghan na sa nabiktima sa maong kalamidad nga nagpuyo sa Samar ug Tacloban ang namakwet dinhi sa Sugbo. Gusto silang mobiya sa ilang dapit nga alang kanila dili na angay puy-an.

Tinuod nga angayan silang tabangan. Apan mas maayo usab tingali nga gahinan sa pagtagad sa gobiyerno ilabi na sa mga opisyal sa Sugbo kun unsay mahimong mahitabo kun modaghan pa gayod unya ang mga bakwet nga modangop sa Sugbo. Unsay ikahatag kanila nga trabaho aron mabuhi uban sa ilang pamilya?

Sa pagka karon lagmit wala pa kini mahunahuna sa gobiyerno kay ang gihatagan og dakong pagtagad mao ang pagluwas kanila gikan sa kagutom ug kauhaw ug pagtambal kanila. Apan sa madugay na, mabatyagan na ang epekto sa pagdagsang sa mga bakwet dinhi sa Sugbo kun kining mga tawhana magbuhat na og dili maayo sa katilingban aron makapadayon sila sa pagpabakwit kay dili man sa tanang panahon mahatagan sila sa gobiyerno og pagkaon ug uban nilang panginahanglan sa pagpuyo.

Aron kalikayan ang dili maayong binuhatan sa mga bakwet sa umaabot nga mga adlaw, angayan lang nga tun-an ug hinuktokan sa mga opisyal sa Sugbo kun unsay angay buhaton nga malikayan ang mahimong problema nga ikadulot unya sa mga bakwet labi na sa siyudad sa Sugbo.