Dili makalimtan

Dear Tita Salie,

Hello ug komusta? I just hope  you are fine everytime and I hope nga naa kay peace of mind always.

Tagoa lang ko sa ngalan nga Jay, 21 years of age from Toledo City. Ulitawo ug duna unta’y hinigugma sa una apan karon wala nako masayod kun na unsa na siya. Mao kini ang akong problema nga gustong patambagan kanimo, Tita.

Nilarga ang akong girlfriend paingon sa Negros sa Dumaguete kay adto siya moeskuyla. Education ang iyang kurso. Ug wala ko’y nahimo aron pagpugong kaniya tungod kay alang man usab sa  iyang kaayohan ang iyang lakaw. Bisan kun kini supak sa akong buot ug sakit kaayo sa akong dughan tungod kay magkalagyo mi apan wala gyod ko’y nahimo gawas sa pagdawat na lang.

Aron matambalan ang kamingaw sa dughan, Tita, ako siyang gibisita didto sa Dumaguete  tulo ka higayon. Ug sa ikaduha ka higayon nakong adto kaniya duna gyo’y nahitabo kanamo.

Apan human sa ikatulo namong kita didto sa Dumaguete nausab na ang panghitabo, Tita, kay dili na man siya motubag kun akong tawgan sa cel. Ug dili na usab siya mo-reply kun ako siyang teksan.

Wala gyod ko masayod kun unsay hinungdan ug unsay akong nabuhat nga sayop. Unya nagproblema ko kay bisan unsaon dili man gyod nako siya makalimtan. Unsa may akong buhaton? Palihog pasabta ko. Thank you very much and may God bless you always.

* * *

Hi, Jay, ayaw una wad-a ang imong paglaom tungod kay wala ka pa masayod sa matuod nga nahitabo. Ayaw una dawata ang kapildihan kondili ka pa segurado sa kamatuoran.

Yes, tinuod nga maguol ka kay dili na siya makontak. Apan  nasayod ka ba sa hinungdan kun nganong dili siya makontak? Wala ka pay idea busa ayaw pag-una-una kay masakitan ka lang hinuon sa dili pa seguradong sitwasyon. -- Tita Salie