Ang adobo sa birthday ni Ingo

 â€œHappy birthday to you! Happy birthday to you! Happy birthday! Happy birthday! Happy birthday to you!”

Mao dayoy misugat ni Ingko kining kantaha nila ni Fred, Rick, Gel ug Bel. Human niya’g talikod sa kandila nga iyang giugbok alang sa iyang adlaw’ng natawhan karong adlawa, diha sa dagkotana’g kandila dapit sa groto ni Sto. Tomas de Villanueva, Talaga Parish Church.

Gituyo gani niya nga mangilumkilom na siya nga modagkot aron mingaw na ug way makakita kaniya nga may pagka-diosnon siya gamay. Mubo ra gani iyang gipangadye. Nagpasalamat siya nga miabot pa karon ang iyang kinabuhi ug lugwayan pa’g taas kaayo iyang kinabuhi sa Ginoo nga mokabat pa’g usa gatus kapin uban sa kanunay nga kabaskog, kabatan-on sa iyang paglihuk-lihok aron makadawat siya sa centenary act nga P100,000 ug makapahimulos pa niini.

Naa ra ba kunoy hugonhugon nga mo-1 Million pa gyud kini. Apil sa iyang giampo nga panalipdan siya sa mga sakit, disgrasya ug katalagman. Ipahilayo sa mga dautang tawo ug mga kaaway. Makontento siya sa kalisud sa iyang kinabuhi nga di siya masuya sa mga tawo nga dagha’g mga kwarta ug uyab ug uban pa.

Iya na lang gani ni giratatat tanan. Pero nakit-an ug naabtan pa gyud siya sa iyang mga amigo nga gwatsinanggo. Dagko na kaayo kini’g ngisi nganha kaniya human sa ilang gikanta nga happy birthday, nga maayo kaayo pagka-blending mora’g “Four Aces” kay mga choir man kini sila sauna ni Fr. Lor Ju.

“Salamat, kaayo ninyo Bay ha. Nakatagna gyud mo. Birthday nako rong adlawa,” ni Ingo nga pinugos ang pahiyum.

“Midagkot gud ka’g kandila,” ni Bol nga nagngisi.

“Unya, salamat ra diay? di mi nimo imbitahon sa imong birthday?” ni Gel nga nagpanglad-ok. Kakan-onon na.

“Di lang sa, Bay. Pinobre ra kaayo ron akong hikay,” ni Ingo nga misubo.

“Unsa man diay handa nimo ron Bay?” ni Fred nga nagtingsi “isda? okey ra na.”

“A! Kalami ana! Gi-ra ra na  nimo?” ni Rick nga pinaagbay pa dayon sa abaga ni Ingo ug gimasahe-masahe.

“Bitaw, Bay! Kalami na anang pagkaona alang sa imong birthday, imbitara na mi,”matud ni Gel.

“Na, hala ... mokaon man kaha mo’g adobo. Tana, adto ta sa balay. Bantay bitaw’g moreklamo mo ha!” ni Ingo daw nasuko.

“Kana ba. Mokaon lagi mi. Di mi moreklamo,” matud nila ni Fred, Rick, Gel, ug Bel ug gitabangan nila’g aswat si Ingo padung sa ilang balay.

Pag-abot sa talad kan-anan!

“Asin, dukot ug buwad? Asa mang adobo nga imong giingon, Bay, Ingo?” Dungan nga nahingangha ang upat.

“Kana gud. Asin, Dukot ug Buwad ekwals adubu. Matud ni Ingo, nga mitudlo’g tagsa-tagsa sa mga pagkaon.

“Adobo tuod Bay!” Nagdungan ang upat. Naniga ang mga mata.

Sige, pangaon na mo. Di man kaha mo moreklamo,” ni Ingo sa hinay nga pagtabi. Ug nagtimi-timi sa pagpangaon ang upat. (Katapusan)