Punoan ug bunga

Dili makatulog si Alex sa kasaba sa mga bata sa silingang bunk sulod sa Tourist Class sa barko nga m/v Wonderland. Naa sa ubos iyang higdaanan. Unya sa atbang sa iyang gihigdaan, nagsaka kanaug ang duha ka bata. Babaye’g lalaki nga di mominus sa singko anyos. Mora’g kaluha ang mga bata. Unya may dalaga nga nagsunodsunod nila. Piho nga yaya. Unya may babaye nga naghigda tupad sa laing bunk nga nagbasa og libro. Wa lang nagpakabana sa duha ka bata nga nakaisturbo sa mga silingang pasahero. Way nibadlong sa mga bata. Kay English-speaking sila.

Kasinggiton na si Alex og “Shut Up!”. Apan nagpugong lang siya. Bag-o lang nilarga ang barko. Gikan sa Ormoc padulong sa Cebu. Alas onse sa buntag nilarga. Unya sa biyahe, gusto unta modaginot og katulog si Alex. Kay kulang siya’g tulog sa niaging gabii. Unya sa iyang padulngan happy-happy. Inum ug kinantahay nga way puas. Kay reunion sa iyang mga kaparentihan. Kun wa pa siya padad-i og kuwarta pinaagi sa kuwarta padala, di man unta si Alex motambong ining kalihokana. Apan ang iyang katalirungan ug suod nga ig-agaw nga si Rey nga usa na ka CPA, di man pabalibad. Naobligar siya kay gipadad-an og singko mil pesos para sa iyang pleteplete ug panginahanglan sa biyahe.

Yanong manananggot lang siya sa ilang baryo Kugipad, sakop sa lungsod sa Albuera. Wa man siya kahuman og hayskul. Apan sukad nga naminyo siya ug may duha na ka anak, nag-sideline siya’g laing trabaho. Nanagat siya. Namanday. Ug nanguma. Gipatumod sab niya iyang tuba sa iyang kapikas nga si Sonia. Kontento na siya sa iyang kinabuhi sa probinsiya. Apan kini laging mga paryente nga naadunahan, gusto man gyung makighimamat sa mga paryenteng kabos. Nibiyahe siya. Basta dili iyang gasto.

Nahitagpilaw siya kadiyot. Unya nakamata na sab siya sa kasaba sa mga bata. Mga adunahan ang hitsura sa mga bata. Unya daw sa Amerika natawo. Kay larino na man kaayo mag-Iningles. Nibangon siya.

“Tagadiin man mo, Day?” ni Alex ngadto sa batang babaye.

“What?” naisang kilay sa babaye.

“Hain man inyong mga ginikanan, Dong?” ni Alex ngadto sa batang lalaki. “What?” naisang kilay sa batang lalaki.

“Ikaw yaya ining mga bata, Day?’ ni Alex ngadto sa dalagang nagsunodsunod sa mga bata.

“O, Noy. Ako” sa babaye. Mapasigarbohon.

“Wa ka kabadlong ini nila? Nga saba man kaayo? Daghang pasahero nga gustong mopahuway. Di kapahuway sa ilang kasaba!” ni Alex. Wa katingog ang yaya.

“Ngano? Unsay problema?” sa babaye nga nagbasa og libro ganiha.

Unya niundang og basa pagkadungog ni Alex.

“Ang problema, maam (gi-maam ni Alex kay desente ug respetado og hitsura ang babaye) kay gusto unta kong matulog. Unya di ko katulog sa kasaba sa mga bata. Imo ning mga anak?’ ni Alex.

“O. Ako ning mga anak! Ngano man diay?” sa babaye. Manghod sa singka ang tuno.

“Brayit unta imong mga anak. Kay maayo nang mo-Iningles bisan gagmay pa. Apan way good manners and right conduct!” ni Alex.

“Klaroha nang gipanulti nimo Noy ha!” sa babaye.

“Ka-klaro ana. Ay ko’g ingna di ka kasabot og Iningles?” ni Alex.

“Exclusive private school ang gi-eskuylahan ana nila sa America” sa babaye.

“Kun brayit pa na imong mga anak, makahatag sila’g konsiderasyon sa mga tawong namahuway. Nga dili unta magsabasaba” ni Alex.

Nanaug ang babaye sa bunk. Nagkusmod.

“You two, come here!” gitawag ang mga bata. Gidala niyang mga bata padulong sa gawas sa Tourist Class. Padulong sa canteen sa bapor. Nisunod ang yaya nga nagpanglingi ngadtong Alex.

“Makaayo gyud seguro nang dungagan og duha ka tuig ang hayskul. Aron madugangan og tudlo og Good Manners and Right Conduct ang mga bata” tuaw ni Alex. Nihigda og balik.

Kay kun nagpasukosuko pag dugay ang inahan sa mga bata, duganganan unta niya’g insulto. Nga ang punoan mailhan sa bunga. (Katapusan)