Dear Tita Salie,
Maayong adlaw. Usa ko sa tigbasahan sa imong lindog dinhi sa Banat News. Kanunay lang gyod kong namasin nga makakuha og tubag niining akong suliran, apan hangtud karon wala pa gyod kini kasulbaran. Just call me Marie, 26 na ang panuigon, dili pa minyo apan duna ko’y live-in partner nga nagpangedaron pa og 28 anyos.
Nine years na sukad sa among pagtipon, Tita, apan kanunay lang mi nga magul-anon, tungod kay permi lang mi nga maghandom og anak. Gusto na gyod mi nga makabaton og anak labina kining akong partner tungod kay husto na man mi sa pangedaron.
Dili namo kalikayan nga maibog sa mga magtiayon naa dunay mga anak. Apan bisan unsaon namo paghunahuna dili man gyod namo masabtan kun nganong wala kami hatagi niini nga unta kaya na man namong buhion ang among anak. Usahay moabot ang panahon nga pul-an na lang mi kay wala man gyo’y nahitabo sa among mga paningkamot. Mawad-an mi og paglaom usahay, Tita.
Gusto na gyod namong dunay bata sa among balay. Apan unsaon man namo, Tita? Palihog pasabta ko. Thank you so much and more power.
* * *
Dearest Marie,
Usahay dili nato masabtan ang plano sa Diyos alang sa atong kinabuhi. Lisod gyod tugkaron ang iyang kabubut-on. Kay segun sa atong mga naobserbahan sa atong kalibotan, dunay mga panghitabo nga dili nato masabtan. Sama pananglitan sa inyong sitwasyon isip magtiayon, dugay namo nga nangandoy nga hatagan og anak sulod na sa 9 ka tuig apan hangtod karon wala gyod mo niya tagai. Apan daghan diha nga atong makita nga nagpugong nga dili na unta mabuntis apan nanganak lang gihapon. Daghan sa atong mga batan-on, mga estudyante pa ug bisan ka usa pa lang sila nakig-sex sa ilang uyab, bisan dili pa unta andam apan nabuntis dayon. Nganong ingon man kaha kini niini ang iyang gustong mahitabo? Wala gyo’y nasayod kanato.
Padayon lang kamo sa pag-ampo ug kanunay ninyong pangayoon sa labaw’ng makagagahom nga unta iya na kamong hatagan og gasa nga dugay na ninyong gipaabot. And of course, mas maayo usab kun magpatan-aw kamo og doctor aron inyong masayran kun unsay hinungdan kun nganong wala gyod ka masudli.
Tingali kun inverted ang imong uteros pareho sa akong amiga nga wala sab manganak, ug nakit-an dihang nagpa-ultrasound siya. Ug puyde nimo kining ipagalam aron maplastar. Basin usab kun dunay deperensya ang similya sa imong bana mao nga dili gyod ka mabuntis. Ang atong mga pangutana dili gyod matubag kondili ka magpatan-aw og doctor. -- Tita Salie