Inahan gayud

Giparebolusyon ni Paul ang motorsiklo iyang gisakyan pag-urong niya atubangan sa gate sa ilang balay sa baryo Lahing, lungsod sa Medellin. Bag-o lang ni niyang napalit nga motorsiklo (big bike type) sa usa ka tuig niyang tinigum sa iyang suweldo isip Computer Engineer.

Ning adlaw’ng Domingo, sayong kahapunon unang  higayon nga gidala niya sa ila ang maong motorsiklo. Niamin siya’s iyang mama Dina nga nigawas sa balay pagkadungog sa bagring sa motorsiklo nga mora’g helicopter.

“Wa man ka magsulti nga magpalit diay ka’g motorsiklo!” matud sa iyang mama nga masuk-anon ug hait ang tinan-awan ngadto ni Paul.

“Wa na lang tika sultihi kay si Manoy Jessie duna man say motorsiklo. Dugay na kong nangandoy makahupot og ingon ining motorsiklo,” ni Paul. Nagpanglingo iyang mama nga nadismayo ang hitsura.

“Kay kun naghisgot pa ka nako ako untang isugyot kotse na lay imong paliton o bisan unsang four wheels nga sakyanan. Kay risgo man gud ang motorsiklo,” sa mama niya.

“Namat-an man gud nako og buot ang motorsiklo. Sa buhi pa’s papa Pedro duna siya’y motorsiklo. Gikan sa gamay pa ko sakaysakay na man ta’s iyang motorsiklo tibuok pamilya. Wa man lagi ta madisgrasya. Depende lang na’s pag-amping sa nagdala,” ni Paul. Kaniadto ahente sa dealer og motorsiklo iyang papa. Gihataga’g motorsiklo aron serbis niya. Namatay sa atake’s kasingkasing lima ka tuig nang nakalabay.

Iyang mama magtutudlo sa Medellin National High School. Karon retirado na. Ug pensiyonada na. Iyang manoy Jessie ang nipuli sa puwesto sa iyang mama, minyo na’s Jessie ug magtutudlo sab ang asawa. Tua na’s Poblasyon namuyo.

Ganahan gyud kaayo’g motorsiklo si Paul. Kay pangporma man kaayo. Labi na nga duna siya’y maanyag nga uyab nga iya unyang pagbakrayron sa iyang motorsiklo. Kausa ra sa usa ka bulan tig-ulian dinhi si Paul. Kay ang iyang trabahoan tua man sa siyudad sa Lapulapu, nag-abang siya’g lawak duol sa iyang gitrabahoan.

Wa na lang nagtingog iyang mama. Nibalik og sulod sa balay. “Anne, ikaw lang say bilin dinhi ha. Kay duna koy lakwon,” sa iyang mama ngadto sa ilang maid.

“Pasakya hinuon ko kay adto ko’s Gaisano, Bogo” sa iyang mama paggawas og balik. Nagsul-ob nag maong nga long pants. Giilisan ang bistida nga gisul-ob pag-abot ni Paul ganiha.

“Tana,” ni  Paul nga mapahiyumon. Nahimuot siya kay wa na magyawyaw iyang mama. Wa na lang mangutana’g unsay tuyo sa iyang mama sa Gaisano.

Paggawas sa iyang mama gikan sa department store, nagdala og dakong putos.

“O, ibutang ni’s glove compartment sa imong motor,” sa iyang mama nga nagtunol sa putos.

“Unsa man ni?” ni Paul. “Raincoat!” sa iyang mama.

“Pasukosuko pa gyud ka nga nagpalit ko’g motor. Unya gipalitan man lagi ko nimo’g raincoat?” ni Paul. Nagpahiyom.

“Uwan ra may kontra anang magmotor. Di ko gustong mabasa ka’g uwan sa biyahe. Masakit unya ka,” ni mama niya.

“Salamat ma,” ni Paul. Gigakos niya iyang mama. Gihagkan sa aping. “Inahan gayud!” tuaw niya sa hilom. (Kataposan)