Gusto makatabang

Dear Tita Salie,

Maayong adlaw. Ako diay si Ms. T. dili pa minyo apan duna koy live-in partner karon ug dunay 1 ka anak.

Ang akong problema mahitungod kini sa akong partner nga magsige lang og saad kanako apan wala’y katumanan.

Dili man gud mi magkasinabot sa iyang mama, ambot lang nga gamay ra gyud ang kalibotan alang kanamong duha kay dali ra mi magkabikil. Dugangan pa sa iyang igsuon nga perti kahilabtanon bisan kini kun minyo nang dako. Mag-apil-apil gihapon sa among kinabuhi.

Tungod niini gusto gyud nako nga maglain mi pagpuyo. Perti lang siyang mosaad nga mamalhin na mi aron duna mi kaugalingong puy-anan ug dili na mangipon apan hangtod karon mao lang gihapon.

Usahay makahunahuna ko nga magminyo na lang og foreigner aron dunay ikasuporta sa akong anak. Ug niining paagiha matabangan pa nako ang akong mama ug papa nga kabos kaayo ug posible pang maka-eskuwela ang akong mga igsuon.

Ako man gud ang kinamagulangan, Tita, busa gusto gyud unta ko nga makatabang sa akong pamilya.Apan unsaon nako karon nga nagapos man ko niining akong kahimtang ug natugpa sa lalaki nga wala’y panglantaw sa kinabuhi. Unsay maayo kong buhaton, Tita? Palihog pasabta intawon ko. Daghang salamat sa pagtagad.

* * *

Hello Ms. T!

Alang kanato ang pagpakigminyo og foreigner ang kasulbaran sa atong problema financial. Tungod kay atong nakita nga ang mga nakabana og foreigner miasenso gyud ang pagkabutang ug nadatu. Adunay uban nga gitabangan pa ang ilang pamilya ug pamilya sa ilang mga igsuon. Pero mao lang kini ang atong nasaksihan. Wala nato makita ang situwasyon sa uban. Dili lamang nato hunahunaon nga suwerte ang tanan tungod kay dunay uban nga nagmahay ug nagbasol tungod kay wala’y suwerte ang ilang naminyoan. Dunay uban, tihik ug kuripot ug maikog gani silang mogasto sa kuwarta sa ilang bana kay manuyo kini. So, unsaon na man lang pagtabang nila sa ilang pamilya? Dunay uban gihimong ulipon o sulogoon sa foreigner nilang bana, igo lamang sila sa pagmahay.

Kun duna kana’y pamilya mas maayo gyud nga molain mo og puyo. Tungod kay kun mangipon lang mo sa imong ugangan mora’g dili gyud mahimo nga dili mo magkasungi. Ug dili ka usab makabuylo ug kanunay kang magkinto ug mag-amping kay dili man kini imong panimalay.

Lahi gyud ang feeling kun ikaw ang Rayna sa inyong pinuy-anan. Busa tabangi ang imong partner ayaw pagsalig niya, paningkamot pud og imo aron matuman ang imong gusto. -- Tita Salie