Isla Paraiso

Mitutok pag-ayo si Rey kang sister Veronica nga nagduko. Sa iyang tan-aw, misamot ang katahom sa babaye nga kanhi iyang gihalaran sa tim-os niyang pagmahal ug paghigugma sa gisul-ob niining sapot sa usa ka madre.

“Malipayon ka ba sa kombento, sister Veronica? Miusab pagpangutana si Rey dihang wala gayod motingog ang madre.

“Nganong kana man ang imong gipangutana kanako?” miyanghag si sister Veronica.

“Gusto lang kong masayod,” ni Rey pa. “Apan kun dili nimo tubagon, it does not matter.”

“It’s alright,” sa madre pa. “Total, dili man daotan ang imong pangutana. Ang akong ikatubag sa pangutana mo simple ra kaayo. Malipayon ko sa pag-alagad sa Diyos ug sa iyang katawhan.”

Wala motingog si Rey. Iyang gitan-aw ang madre kang kansang mga mata gilantaw ngadto sa karsada sa unahan nga ilang gipadulngan.

“Ikaw?” Mibalos pagsukot si sister Veronica. “Malipayon ka ba usab sa imong pagka-polis?”

Mipahiyom si Rey una motubag. “Oo. Sama nimo nag-alagad usab ako sa katawhan. Sa mabuot nga katilingban nga magbubuhis. Ug nasinati ko ang katam-is sa tinud-anay nga pag-alagad.”

Naputol ang ilang panagsulti sa dihang mihunong ang taksi nga ilang gisakyan. Paglili nila ngadto sa gawas, nakita dayon nila ang karatola nga gisulat sa dakong mga titik. ORCHIDS SISTERS CONVENT. Midali si Rey pagkanaog ug giablihan ang pultahan dapit kang sister Veronica. Nanaog ang madre. -- Sumpayan pa