Mapait nga panagkita

Wala na lang gani mukaon si Nito, paghiabot niya sa may bus terminal bisan tuod og gigutom na kaayo siya. Naninguha man gud siyang makasakay dayon niadtong usa ka trak de pasaheroan nga mobiyahe paingon sa ilang dapit nga hapit na molarga.

Bitbit ang dala niyang bag, miluwan dayon siya sa maong sakyanan nga nagsige na og andar niadtong tungora ug naghuwat na lang sa hustong oras nga iglalarga. Dili hinuon kaayo puno ang maong sakyanan sa mga pasahero. Gani diha pay daghang mga bakante nga lingkuranan.

Tungod sa katulin sa dagan sa sakyanan nga wala gyu’y hunong-hunong dali ra kaayo silang nahiabot sa ilang dapit. Kun sa ilang lungsod nga  naa mahimutang sa amihanang bahin sa lalawigan sa Sugbo. Gani igo lang siyang nahitagpilaw og kadiyot. Gikapoy man gud siya sa iyang biyahe. Gikan pa sa Metro Manila.

Kay napasidan-an man niya ang kundoktor sa maong sakyanan diha gayud kini mohunong sa may tungod sa ilang balay nga gikoral og hollow blocks ang palibot niini. Sa tan-aw pa ni Nito, mora gayud og wala’y nausab sa mga talan-awon diha sa palibot. Kay diha pa man gihapon kadtong mga balay nga gipuy-an sa pipila nila ka mga silingan.

Hinuon, dihay pipila ka mga talan-awon nga mora’g bag-o pa sa iyang mga mata. Ilabi na kadtong modernong kapilya nga diha mahimutang haduol sa ilang puloy-anan. Wala pa man gud kini diha sa iyang paggikan paingon sa Metro Manila. Diin siya manimpalad sulod sa mga lima na ka tuig.

Nahibulong na lang si Nito kay daghan man kaayong mga tawo nga diha sa ila sa iyang paghiabot. Nakapangutana gani siya sa iyang kaugalingon kun unsa kahay okasyon? Ngano nga daghan mang mga tawo ang diha sa ila niadtong higayona? Unta dili pa man karong adlawa ang pista sa ilang dapit.

Gani nagplano man unta siya nga atol  na sa pista siya mouli sa ila. Ug wala man unta siya’y plano nga mouli karong higayona. Kun di pa lang unta tungod sa usa ka mahinungdanon kaayong tuyo nga mao ang pagkuha sa iyang birth certificate nga iyang kinahanglanon kaayo. Alang sa iyang tinguhang makatrabaho sa laing nasud.

Pagsaka pa lang gani ni Nito sa ilang balay gisugat na siya sa iyang inahan nga puwerting nakaminatay og hilak. Migakos pa gani kaniya ang iyang inahan sa dayon na niya’g saka sa ilang balay. Maong nakapangutana si Nito kun unsay gihilakan sa iyang inahan. Ug nganong daghan kaayo ang mga tawo diha sa ila.

Mora’g midat-og kang Nito ang tibuok kalibutan sa dihang misugilon kaniya ang iyang inahan nga namatay diay ang iyang amahan. Naaksidente diay kini samtang nagbiyahe kini paingon sa dakbayan. Nahulog diay ang gisakyan niini.

Nagdagan nga miduol si Nito sa nahimutangan sa haya sa iyang amahan. Ug sama sa usa ka gamay’ng bata nga giilugan sa iyang duwaan mitiyabaw siya’g kusog kaayo  samtang nag-akbo sa lungon nga maoy gisudlan sa iyang amahan. Wala man gud siya magdahom nga mao hinuon kini ang mahimo niyang sinugatan. (Kataposan)