Bagyong Yolanda nakaepekto sa panagat sa Kabisay-an

Dako ang nakitang epekto sa panginabuhi nga panagat nga maoy namugna sa gipakitang kabangis sa bagyong Yolanda nga mikusokuso sa Kabisay-an niadtong Nobiyembre 8 niining tuiga nga maoy nakaaghat karon sa  Bureau of Fisheries and Acquatic Resources (BFAR)   sa paggahin og P40 milyones isip dinalian nga pinansiyal nga hinabang sa mga mananagat sa Kabisay-an.

Si Allan Poquita nga maoy assistance director sa BFAR-7 nga nahinabi niining tagsulat  miingon nga tungod sa grabeng kadaut sa mga panagatan dinhi sa Kabisay-an daw gibati niya ang kabalaka nga magnihit ang isda ug momahal pa gayod ang pagbaligya.

Sa nasayran nga gibanabana sa nahisgotang buhatan ang mokabat sa P1 bilyon nga kadaut ang gibilin sa maong bagyo sa panginabuhi sa panagat ilabi na sa Kabisayan-an nga maoy nasentro sa pagkaigo niini.

Ang panginabuhi nga pagpanagat wala’y kalainan sa panginabuhi sa mga mag-uuma nga kun makasinati na gani og kadaut ilang panginabuhi tungod sa katalagman nga moigo daghan usab ang katawhan nga maepektohan kay sila mao man ang gisandigan  sa matag adlaw nga ihukad sa ilang talad kan-anan.

Si BFAR Director Asis Perez  miingon nga ang bagyong Yolanda miguba gayod sa gagmay nga commercial fishing vessels sa Region 6, 7 ug Region 8 nga mao usab ang nakaingon og dakong kadaut sa maong matang sa panginabuhi nga dili moubos sa 1,844 metriko tonelada nga isda nga makuha nga nagkantidad og P92.2 milyones.

Dugang pa niya nga ang aquaculture  maoy mohimo sa pagtapak sa 867 metriko toneladas ngadto sa mga nabungkag nga mga fish pond nga mokabat sa P43.35 milyones ang kantidad.

“These figures, possible nga motaas pa sa matag adlaw nga pagpanagat sa mga mananagat ug lakip na sa mga fishing companies nga naepektohan human sa pag-igo sa bagyo,” nagkanayon si Perez. Si Perez miingon, si Pangulong Benigno Aquino III nagmando na kanila sa pagpadali sa pagpaayo sa mga naguba nga panagatan sa nagkadaiyng rehiyon nga maoy nasugamak sa pagkusokuso sa bagyong Yolanda.

Gitataw niya nga nakig-alayon na karon sila sa mga municipal fisheries sa kalungsoran ug mga dakbayan sa BFAR   nga mga buhatan aron ilang kahatagan og katumanan ang pagpabuhat og 1,300 ka mga fishing boat nga kumpleto na sa kahimanan sa pagpanagat ug sa pagpangisda.