Milabay ang mga adlaw nga wala na gayud magpakita pa si Edgar kang Maridel didto sa department store. Adlaw’ng Sabado, wala paabuta ni Edgar nga moadto sa Cebu City Jail sa Barangay Kalunasan si Maridel.
Gipasabot si Maridel ni Edgar kun ngano nga wala na siya ganahi pa sa ilang relasyon – tungod sa milutaw na niya nga batasan. Wala makatingog si Maridel dihang giprangkahan siya ni Edgar nga giputol na niya ang ilang relasyon.
“Mentras sayo pa, dili na lang nato padayonon ang atong relasyon kay mora’g dili magkatukma ang atong batasan Del, mag-away lang unya kita kanunay,†kalma nga gipasabot ni Edgar ang salesgirl.
Walay nahimo si Maridel. Gihatud ni Edgar si Maridel sa gawas sa bilanggoan ug gipasakay sa habal-habal nga mohatud kaniya sa dapit nga adto kini makasakay og jeep balik sa downtown.
Nanglabay pa ang mga adlaw. “Bai Edgar, dunay naghuwat nimo, tua namo gipahuwat sa kubo-kubo para magkasultihanay mo’g maayo,†giingnan si Edgar sa kauban niya nga jailguard.
Naghuna-huna si Edgar kun kinsa kaha ang mibisita kaniya sa bilanggoan. Dihang duol na siya sa kubo, nakita niya ang babaye nga nagduko nga dunay gitan-aw sa iyang selpon.
“Ako ba ang imong gipangita?†matud ni Edgar. Napasiga ang mga mata ni Edgar kay si Nelia diay ang babaye nga mibisita kaniya. “Nelia? Dia ka lagi?†mora’g dili matukib sa pulong ang kalipay ni Edgar.
Nagpahiyom si Nelia. “Kumusta na ang imong lovelife Gar? Naminyo ka na ba?†nangutana si Nelia.“Wala pa gihapon Nel, Ikaw?†pintok nga tubag ni Edgar.
Gisuginlan ni Nelia si Edgar nga namatay na ang iyang bana nga nabilanggo didto sa New Bilibid Prisons. “Ha? Kun mao Nel, mahimo na nga ipadayon nato ang atong pagminahalay?†matud ni Edgar.
Gigunitan ni Edgar ang kamot ni Nelia. “Tuguti nga ipadayon nato ang naputol ta nga kagahapon Nel,†dugang ni Edgar nga saya kaayo’g panagway.
“Ikaw gud, wala ka pa man kaha’y kabilinggan. Mao kana ang rason nga gianhi ko ikaw Gar,†ni Nelia pa nga sama ni Edgar nagpahiyom.
Pag-off ni Edgar, gidala na niya diritso si Nelia sa iyang gipuy-an. “Gikan karon, ikaw na ang hara niining akong panimalay,†iyang giingnan si Nelia.
Usa ka Domingo, nagkalingaw si Edgar pagpaminaw sa iyang mga paborito nga kanta nga gi-save niya sa iyang USB. Mitugtog ang awit ni Barry Manilow nga Somewhere Down the Road.
Nakapahiyom si Edgar nga naminaw kay tukma g’yud kaayo ang lyrics sa kanta nga nagkanayon “Sometimes goodbye are not forever.†Wala siya makabantay nga miduol kaniya si Nelia.
Gigakus ni Edgar si Nelia ug iyang gihagkan sa tumang kamapinanggaon. - Kataposan