Willing makigminyo

Dear Tita Salie,

Maayong adlaw ug hinaot nga malipayon ka kanunay sa imong kinabuhi. Hinaot nga anaa kanunay ang imong kadasig sa pagtabang labi na sa panahon nga nagkinahanglan kami og somebody aron mopasabot kanamo sa among mga kalibog.

Tagoa lang ko sa pangalan nga Ms. Taurus, usa ka dalaga ug dunay hinigugma ug siya ang hinungdan kun nganong midangop ako kanimo, Tita ug nangayo sa imong panabang.

In love kaayo ko niining akong boyfriend tungod kay buotan kaayo siya, generous, understanding kaayo ngari kanako ug caring pa gyud. Nasayod ko, Tita, nga mahal usab ako pag-ayo niining lalakiha tungod kay willing or andam kaayo siya nga makigminyo kanako. Alang kanako wala na gyu’y problema mahitungod sa among pagbati.

Apan ang ako lang problema, Tita Salie, kay duna man gud siya’y live-in partner karon ug duna silay 1 ka buok anak. Apan duna man koy laban niini tungod kay wala pa man sila makasal Tita. Busa puwede pa nga kami ang magkadayon dili ba Tita?

Mahal gyud kaayo nako siya ug dili ko gusto nga mahanaw siya kanako. Unsa may angay nakong buhaton? Palihog pasabta ko. Thank you so much and God bless.

* * *

Dear Ms. Taurus,

Yes husto ka nga may laban ka pa sa imong hinigugma tungod kay dili pa siya minyo kay dili pa man sila kasado sa iyang partner karon. Ug dili usab puwede pugson ang imong uyab nga makigminyo sa iyang kapuyo kun dili gyud niya gusto. Kinahanglan nga ang iyaha gyung kabubut-on ang masunod kun kinsay iyang pangasaw-on. Siya ang dapat mopili kun kinsay iyang dad-on sa altar sa kaminyoon. Ug karon puwede pa niya kining buhaton kay gawasnon pa man siya. Puwede ikaw ang iyang pilion ug sustentohan lamang niya ang iyang anak, puwede usab ang iyang partner karon ug puwede usab nga laing babaye ug wala kaninyong duha. Tungod kay walay nasayod nga duna pa siya’y daghang babaye nga gisaaran.

Tinuod lagi nga gawasnon pa siya apan ayaw usab kalimti pagtan-aw ang iyang pagkatawo. Nakaya niyang luiban ang iyang partner karon ug ang iyang anak. Wala ka ba makahunahuna nga puwede niya kining buhaton kanimo? Wala ba nimo makita ang iyang gibuhat sa iyang live-in partner nga iyang gimata og buntag ug wala gyu’y kalibotan nga nanguyab siya og lain. Dili ka kaha magproblema kaniya kun ugaling siya ang imong mabana?

Dili ka ba usab maluoy sa iyang partner nga sama usab kanimo masakitan kun biyaan? Mas lisod sa iyang lugar kun mawad-an kay duna na siya’y anak nga mas mag-suffer sa epekto kun magkabulag sila. -- Tita Salie