Awit ug gugma

Gula 6

Hingpit gayud nga napabatyag ni Edgar og talagsaong kahinam si Maridel tungod sa walay puas niya nga pagromansa sa dalaga. Nakigparayganay na si Maridel kang Edgar ug nakapasamot kini sa kaikag ni Edgar.

Misamot kainit ang kalawasan ni Edgar. Wala magsilbi ang kabugnaw sa huyohoy nga nagdala’g mga gabon tungod kay init na ang pamati ni Edgar sa iyang kalawasan.

Ingon na diay usab niini ang gibati ni Maridel. Misamot pa kainit ang ilang pagparayganay. Nagsugod na si Edgar sa pagpanghiram sa kalawasan sa maanyag nga salesgirl.

“Ayaw, aaayaw Gar, please,” matud ni Maridel dihang gihiram na ni Edgar ang mga pribadong parte sa iyang kalawasan. “Kita ra karon ang ania dinhi, ayaw kahadlok,” gialam-alaman ni Edgar ang dalaga. Wala gayud magpapugong si Edgar. Sa ngadto-ngadto, gipasagdan na lang ni Maridel si Edgar nga nanghiram sa iyang kalawasan nga nakasugnib og talagsaong kahinam.

“Edgar, Edgarr,” miginhawa’g lawom si Maridel nga nadutlan na pag-ayo sa talagsaong kahinam.

Naangkon gayud ni Edgar si Maridel sulod sa iyang kotse bisan sa lisud kaayo nila nga kahimtang. Gabii na sila nga mibiya sa kabukiran.

Gihatud ni Edgar si Maridel sa iyang gipuy-an nga panimalay. Sa wala pa manaug si Maridel, gitagbaw pa gayud niya ang iyang kaugalingon sa paghawok sa dalaga.

Mapahiyumon kaayo si Edgar nga mipauli sa iyang boarding house. Ang nahitabo kanila ni Edgar ug Maridel, nasundan pa sa laing mga higayon.

Apan sa pagpanglabay sa mga adlaw sa ilang relasyon, nakabantay si Edgar nga anam-anam nga nausab ang batasan ni Maridel. Kusog na kini nga modemanda kaniya og masuko na kun malangay sa pag-abot.

Kini gani maoy sagad nga rason nga sila magkaaway. Plano na unta kadto ni Edgar nga pangasaw-on niya si Maridel apan nagduha-duha na siya tungod sa gipakitang taras sa dalaga niining ulahi nga mga adlaw.

Usa ka higayon, dunay mieskapo nga piniriso sa city jail ug usa si Edgar nga gitahasan sa pagpangita sa pugante. Wala niya makuha si Maridel sa gitrabahoan nga department store ug magdungan unta sa dinner sigun sa ilang gikasabotan nianang udto.

Giteksan ni Edgar si Maridel ug gipasabot ngano nga dili siya makatuman sa gisaad niya nga sila mag-dinner. Wala mosabot si Maridel sa pagpasabot ni Edgar.

Nagduda si Maridel nga pasangil lang ni Edgar nga dunay misyon kanila ang ilang opisyal apan nakigdeyt kini’g laing babaye. Niini wala na makapugong pa si Edgar.

Nahukman niya nga putlon ang ilang relasyon ni Maridel. Wala na gayud siya makigkita sa dalaga. - Sumpayan