Awit ug gugma

Gula 5

Dihang didto na sila sa tumoy sa bungtod ug malantaw na gayud nila ni Edgar ug Maridel ang lainlaing dapit sa Sugbo, nasabot ni Edgar nga mibati og dili tiaw nga kalipay ang dalaga.

“Kanindot dinhi uy. Ang akong boyfriend kaniadto wala g’yud makasuroy nako sa ingon niini nga dapita Gar,” giingnan ni Maridel ang higala niya nga jail guard. “Kun mao na, mas maayo pa diay ko sa imong boyfriend,” matud ni Edgar nga nagpahiyom.

Mihuros ang bugnaw kaayo nga huyohoy. Bana-bana ni Edgar anaa na sa ilang palibot ang panganod kay usahay dili nila makita ang ubang bahin sa dakbayan.

Namatikdan ni Edgar nga mora’g nangurog sa katugnaw si Maridel kay masabot kaayo sa iyang sinultihan nga usahay magkayuring lang. “Gitugnaw ka ba Del?” gisukna ni Edgar ang salesgirl niya nga amiga. “Mao g’yud, tugnaw kaayo Gar,” ni Maridel pa.

“Ganahan unta ko nga mogakus nimo apan basin lainon nimo og sabot,” matud ni Edgar. Mipahiyom si Maridel nga miatubang ni Edgar. “Ganina ra bitaw ‘sab ko nga kadip-igon nimo aron mawala ang katugnaw pero maikog ‘sab ko Gar.”

Nakasabot si Edgar nga dili diay masuko si Maridel kun iya kining gakson aron pagwagtang sa katugnaw nga iyang gibati. Una nga gihimo ni Edgar, iyang giagbayan si Maridel.

Mora’g gisungog g’yud si Maridel kay mihamag na usab kanila ang bugnaw kaayo nga panganod. Nangurog na g’yud ang kalawasan ni Maridel. “Tana Gar, mamalik na ta sa awto kay tugnaw na kaayo,” hinay kaayo sila nga naglakaw samtang giagbayan ni Edgar ang dalaga.

Ngiob na ang palibot didto sa bukid nga ilang nahimutangan. Misulod dayon sa kotse si Maridel ug gisirad-an ang pultahan. Milingkud usab si Edgar didto sa driver’s seat.

“Tugnawa g’yud uy, grabe,” ni Maridel nga nagkurog gihapon. Gikawhat ni Edgar ang iyang jacket nga gibutang niya sa luyo nga lingkoranan. “Isul-ob ni Del para maiban-ibanan ang gibati mo’ng katugnaw,” matud ni Edgar.

Gitabangan ni Edgar si Maridel sa pagsul-ob sa jacket. Human masul-ob ni Maridel ang jacket, giagbayan siya ni Edgar ug gigakus. Wala mutingog si Maridel nga giagbayan ug gigakus siya ni Edgar.

Kun gitugnaw man si Maridel, nanginit ang kalawasan ni Edgar nga nakagakus sa dalaga. “Bali man ang atong  gibati Del. Ikaw gibati’g katugnaw apan ako init kaayo ang kalawasan nga nakagakus nimo,”  matud ni Edgar.

Wala na mananghid pa si Edgar nga gipatikan niya’g hawok ang mga ngabil sa dalaga. - Sumpayan