Awit ug gugma - Gula 4

Human nila’g pangaon ni Edgar ug Maridel didto sa Larsian sa Fuente Osmeña, gihatud ra dayon niya ang dalaga sa gipuy-an niini.

“Anhion tika ugma sa hapon Del, igo-igo nga mahuman ka na og panglaba aron manuroy ta. Good night and sweet dreams,” giingnan ni Edgar ang maanyag nga salesgirl.

Pahiyom ra’y gibawos ni Maridel ngadto ni Edgar. Mipasirit pagpadagan si Edgar sa iyang kotse dihang nakasulod na si Maridel sa balay nga iyang gipuy-an.

Sa tinagdan ni Maridel kaniya mora’g nalantaw na’ng daan ni Edgar nga dili siya pakyason sa dalaga kun siya manguyab. Tuod, pagkaugma, mga alas tres sa hapon didto na si Edgar sa gipuy-an ni Maridel.

“Asa man ta manuroy Gar?” matud ni Maridel nga nakaandam na diay’ng daan sa ilang pagpanuroy. “Bisan asa kanang malingaw ka Del. Kapoy kaayo nga sige lang trabaho mao nga kinahanglan usab nga maglingaw-lingaw,” ni Edgar.

“Kanindot diay ni’ng duna kita’y sakyanan no? Pwede ta muadto bisan asa nga atong gusto nga dili hasol,” matud ni Maridel. Gipahunong ni Edgar ang kotse atubangan sa usa ka kan-anan sa General Maxilom Avenue.

Giingnan niya si Maridel nga magpabugnaw usa sila. Mi-order og halo-halo si Edgar para kanila’ng duha. “Dili na ta manuroy sa department store Del kay sigurado ko nga napul-an ka na sa talan-awon sa tindahan,” giingnan ni Edgar ang dalaga.

Mipahiyom si Maridel. “Mao g’yud, puol na kaayo ang talan-awon sa tindahan.” Human nila’g snack, mibalik sila sa kotse ug mipasirit si Edgar pagpadagan.

“Mag-sight seeing ta Del sa bukid. Amigo nako ang gwardya nianang wala pa mahuman nga subdivision diha sa kabukiran sa Guadalupe, adto ta didto, maayo kay overlooking sa siyudad,” matud ni Edgar.

Tuod, mitungas sila sa nagliko-liko nga karsada paingon sa kinaibabwan sa bukid. Didto g’yud mihunong si Edgar sa dapit na sa taluktok sa bukid nga nag-umbaw na sa tibuok dakbayan sa Sugbo.

“Hala, kanindot diay dinhi no?” nakatuaw si Maridel dihang migawas na sila sa kotse. “Higala nako ang tag-iya niining maong subdivision, si Mr. Villalon ug makausa gisuroy mi niya dinhi,” ni Edgar pa.

Mingaw kaayo ang maong lugar, wala’y laing tawo nga nagsuroy-suroy kay wala pa man mahuman ang gimugna nga subdivision. Naglakaw-lakaw sila si Edgar ug Maridel ug gitungas nila kadtong karsada paingon pa sa mas ibabaw og dyutay sa giparkingan sa ilang gisakyan.

“Kanindot puy-an dinhi no?” matud ni Maridel. “Mao g’yud. Apan mahal kaayo ang yuta dinhi ug dili ka ‘sab baligyaan kun gamay ra ang imong paliton,” pasabot ni Edgar.

Gikan sa ilang nahimutangan, makita na ang katahom sa dakbayan kay naniga na ang mga suga sa downtown area. - Sumpayan